Thung kynhun tohkit u DC ba khlad ka longkmie armet ha MCH Hospital, Jowai

Haba iadei bad ka jingjia ba khlad kawei ka longkmie ar met ha MCH Hospital Jowai hynnin ka miet jong ka 4/05/2025, hynne ka sngi naka liang u Deputy Commissioner ka West Jaiñtia Hills District, u Abhinav Kumar Singh ula pyntip ba la thung da ka committee ka ban tohkit halor ka jingkhlad ka longkmie armet kaba thmu leit shah sumar na ka bynta i khun ba ka pun ha MCH Hospital, Panaliar, Jowai.  U DC Abhinav u ong ba katkum ka jingiathuh ka Medical Superintendent ka MCH Hospital, ka ong ba ka Pynchei kam lah ban bam naka daw ba shitom bad ka khlem ud ei ei haduh ka por 2 baje jong ka 4 tarik tad haka por 5:30 janmiet kala ud ba suhkpoh kumta la pynthiah iaka ha High Dependency Unit da kaba peit ruh khah khah iaka daki nongtrei.

Ha ka por 8:10 mynmiet kala kham shitom jur bad ka la khlad noh haka por 9:15. Halor kane ka jingjia u DC u ong bala pynlong iaka jingtohkit da Internal Committee bala shna da ka Medical Superintendent ka Hospital bad la don ruh ki kynhun ba thung da ka Directorate of Health Services bala khlieh da u Jt. Director ka tnat Health ban tohkit halor kane na ki Doctor bad kiba haiing ka longkmie bala khlad.

Ha kajuh ka por khnang ban ioh iaka jingtohkit ba khuid khlem da shah liang, la thung iaka committee ne ka jingtohkit ba laitluid ka ban khlieh da ka ADC ka District, ka kong B Blah, ka District Medical and Health Officer ka West Jaiñtia, ka Dr. P. Shylla bad ki doctor Gynaecologist wa Paediatrician na East Jaiñtia Hills.  Bad hadien bala ioh ia ka report naka jingtohkit yn phah sha ka sorkar halor ka jinglap jingshem.