Shen yn ai jingmut ka MSPB ia ka sorkar ban lait ka dheng kali ha Shillong

Ka Meghalaya State Planning Board (MSPB) shen kan sa aiti ia ka kaiphod shaka Sorkar Jylla haba iadei bad ki jingai jingmut ban tehlakam iaka jingdheng kali ha Sor Shillong. Ïa kane la pyntip da u Chairman ka MSPB u Bah Metbah Lyngdoh bad ula ïathuh ba ka Board ka la dep ban shong jingïalang bun sien ban wad ki lad lynti ban tehlakam iaka jingdheng kali ha sor Shillong. Haba kren sha ki lad pathai khubor u Bah Metbah ula ïathuh baka MSPB ka dang bishar bniah iaki jingai jingmut, ki sienjam ba la aiti da ki tnat bapher bapher kiba don bynta haka jingiamit jingmut, kumno ban tehlakam iaka jingdheng kali ha Shillong.

“Ka MSPB kan sa wanrah paidbah iaki jingai jingmut bad ki sienjam baka Sorkar kadei ban shim bad iaki jingai jingmut bad iaki sienjam ka Board kan sa aiti shaka Sorkar Jylla naka bynta ban pyntreikam ha sor Shillong” la ong u Bah Metbah. Haba iadei bad ka jingïalang halor ka tnat Pule Puthi, u Chairman ka MSPB u la ong “Ban kyntiew bad ban pynkylla dur shuh shuh ia ka pule puthi ha ka Jylla kam dei satia tang ka kamram jong ka Sorkar Jylla hynrei ka donkam ka jingsnohkti lang jong baroh”.

U Bah Metbah u la ïathuh ba dang shen ka MSPB dang shen ka la shong ban iatai halor kane ka bynta kaba iadei bad ka pule puthi bad kumno ban kyntiew bad pynbha shuh shuh ia ka nangne shakhmat. “Tang ka Sorkar marwei kam lah ban leh ei ei namar dei tang lyngba ka jingiatreilang kaba lah ban wanrah ka jingkylla ha ka pule puthi” u la ong.