Ka sorkar ka khlem beh nongdie madan, ka la ai jaka katkum ka hukum ka iingkashari : Sngiawbhalang

U Symbud Myntri Rangbah ka jylla ba peit kam pynroi sor u Bah Sniawbhalang Dhar hynne ka sngi ula ong ba ka sorkar kam shym la kyndang ia ki nongdie madan, hynrei ka la ai jaka ba kin shongdie jingdie katkum ka hukum jong ka iingkashari. Haba iakren bad ki nongthoh khubor u Bah Sniawbhalang ula ong, ka Sorkar ka khlem kyndang satia ia ki dukan madan hynrei kala ai pat ia ki da kawei pat ka jaka shong dukan, kum ha MUDA Complex, kaba long kaba biang bha ba kin lah ban khaii pateng bad ban die ia ki mar ki mata ki jongki. “Ka jinghiar khynra kadei kaba la leh ka kum ka hukum jong ka Iingkashari bad ka jingthmu ka long ban buh noh ia ki nongshong dukan madan ha ki jaka kiba la ithuh” ong u Symbud Myntri Rangbah. Ula ong ruh ba ka jingthmu ban pynkynriah ia ki dukan madan kadei eh ban pynmyntoi ia ki bad ban wanrah ia ka jingkhuid jingsuba hapoh ka sor bad ban pynkylluid ia ki lynti iaid.

“Ka Sorkar kan leh la ka jong ka kam. Ngi la pynlong tang ia ka jingkhynra ban buh ia ki briew jong ngi ha ka jaka kaba dei. Kane ka long ruh katkum ka hukum ka Iingkashari. Baroh na ngi, ngi kwah ia ka sor jong ngi kaba khuid ba suba. Hooid, ngi hap ban burom ruh ia ki nongiaid nongieng bad ki briew ba pyndonkam lang ia ki surok bad ki lynti iaid” ong u Bah Sniawbhalamg. Ula iathuh ruh ba ka Sorkar kala iakynduh ia ki nongshong dukan madan bad kala sngap ia ki jingkyrpad jong ki bad ka sorkar kala pyrshang ban leh ha ka rukom kaba bha ym ban shu bret noh ia ki.

“Ngi la ai ha ki ia ka jaka kaba biang eh ha MUDA Complex, kaba long kaba biang eh ban khaii pateng. Kila kyrpad ia ngi ban buh ia ki ha ka jaka ka bym dei eh ka jaka pynlong iew. Ngi la pdiang ia kata bad ngi la leh ia kaei kaba kila kyrpad” ula ong bad ka bynrap ba u don ka jingskhem jingmut ba ki nongdie madan kin ai ka jingiatreilang bad ka sorkar ban leit shong die jingdie noh ha ki jaka kiba la pynkhreh hapoh jong ka 22 tarik mynta u bnai.U Bah Sniawbhalang ula ong, ba ka sorkar ka khmih lynti ba kine ki nongdie madan kin leit ban shong noh ha ki jaka kiba la buh bad lada bud ia katei ka jingbthah, kumta ka ain kan sa leh ia kaba donkam.