Hiar jurip ka EC, lap bun ki paia mawpud ha khlaw Mawpat

Ka Executive Committee ka Khasi Hills Autonomous Distriict Council (KHADC) hynne ka sngi hapoh ka jingialam jong u CEM u bah Shemborlang Rynjah, ki la pyllong ia ka jinghiar jurip ia ka Law Adong Mawpat hadien ba la mih ki jingkynnoh ba don ki MLA kiba la ioh jaka beain ha katei ka jaka.

Ha kane ka jingjurip la synran lang da u Chairman ka Council u bah Strong Pillar Kharjana, ki Executive Members ka EC, ki MDC na ka VPP, ki ophisar ka Council ryngkat ki Rangbah shnong jong ki shnong bapher bapher.

Haba kren sha ki lad pathai khubor, u CEM ka Council u bah Shemborlang Rynjah ula ong ba ka jinghiar jurip jong ki ia ka khlaw Mawpat ka long ban wan sakhi ia ka jingkylla ha kane ka khlaw, hadien ba ki la ioh pdiang ia ka jingujor na ka Youth Wing bad Womens Wing ka VPP ba ym shym la sumar ia kane ka khlaw bad ki la kynnoh ba ka la don ka jingtreikam buit tuh ha ka ban die ban ai sngewbha ia kane ka jaka.

Katkum ka jingong u CEM, ha ka jingjurip jong ki ba la sdang na shyiap Langkyrding ter ter shaduh Mawroh, la lap ba ki don shibun ki paia ki mawpud ba ieng hapdeng kane ka khlaw bad ka Council kam don jingtip mano ba wan thung ia ki mawpud bad haduh mynta ka Council ka dang sah ha ka umdum.

“Ngim don jingtip ia ki briew ki kynhun kiba wan sieh ia ki mawpud ki dei kiba la iaid katkum ka lynti ka kyndon,” ula ong.

Haba kylli halor ka don ka jingai jaka sha ki MLA, u CEM ula kubur ba ula ioh ia ka khubor ba don ka jingai jaka sha ki MLA bad na ka liang ka Council kan sa shong ia ka EC ban shim ia ki sienjam ban tohkit bniah halor ka jingioh kurup kyndew beain ha kane ka khlaw.

Shuh shuh haba kylli halor ka jingbym don bynta ka Hima Mylliem ha kane ka jingjurip, u CEM ula ong ba kane ka dang dei ka sienjam ba nyngkong ba wan jurip bad lada dei ba khot lang ia ka Hima ka lah ban mih pynban da kiwei ki jingiakren iatai.

“Kane ka jingjurip ba nyngkong ka long ban wan jurip shwa tang mangi bad ka jingkhot jong ngi ia ki Rangbah shnong ka long ban pynshai. Lada don lang na ka liang ka Hima mynta ka sngi la lah ban mih pynban da kiwei pat ki jingiakren jingiatai.,” ong u CEM.