Yn thaw ka sorkar 64 tylli ki jaka ai jinghikai sengkam ha ki thain kyndong

U Myntri Rangbah ka jylla u Conrad K Sangma ryngkat bad ka myntri ka rep ka riang ka Kong Ampareen Lyngdoh hynne ka sngi ki la plie ia ka Youth Mela ba la pynlong da ka Chief Minister’s Youth Centre hapoh All Saints’ Hall, Shillong. Kane ka Youth Mela ba 4 sngi ka la sdang ha 25 tarik bad kan kut ha ka 28 tarik ha kaba yn pynlong ia ki jingialang bad jingiatai, ka Workshop, jingpyninam ia ki projek, Library Corner bad ki jingialehkai bad kiwei na ka bynta ki khynnah rit. Ha kane ka sngi u Myntri Rangbah ula plie ruh ia ka CMYC++ ha katei ka jingialang bad ula sam ruh ia ki Nano Grant Awards sha ki Top 50 Nano Entrepreneurs ne ki nongseng ia ki kam barit.

Haba ai jingkren u Myntri Rangbah ka jylla ula ong, ba ka sorkar ka ngeit skhem beit ba ym lah ban thew ia ki kam jong ka roi ka par da ki nombar ne da ka jingdon ia ki jingtei kiba heh, hynrei ki kam pynroi ki dei ki bynta ba hap ban peit na kiba bun ki liang bad haba ka GDP bad GSPD ka long kaba kongsan hynrei kan ym long kaba pura lada ym lah ban pyniasoh bad ki nongrep, ki nongseng kam ha ki thain nongkyndong, ki longkmie, ki samla bad ban pyniasoh bad ki bynta ki bapher bapher kiba ia dei bad ka imlang sahlang naduh ka koit ka khiah, pule puthi, ki kam jngohkai ha nongkyndong, ka rep ka riang bad kiwei kiwei. U Conrad ula ong, ba ka sorkar ka la pynlong ia ki prokram ba ia dei bad ka jingsengkam ha ki kyrdan ki bapher bapher ban pynthikna ba ka jingsengkam kan ym dei tang ia ki karkhana ba heh ne ka kam khaii kaba heh ha kaba yn klet noh ia ki jingsengkam kiba rit ba ria.

 “Kane ka prokram ka dei kaba ma phi baroh phi dei kiba don bynta lang ha ka khana jong ka roi ka par jong ka jylla Meghalaya bad kam pher lada ka long kumno kumno ruh ka jingseng kam ka jong phi” ong u Conrad bad ka pynpaw ia ka jingkyrmen ba lyngba ki 64 tylli ki Chief Minister’s Youth Centre kiba don ha kylleng jong ka jylla ki nongseng kam kiba rit kin ioh ia ka jinghikai bad jingbtin lynti ban kiew ha ka kam khaii pateng. Ka sorkar jylla lyngba ka jingkyrshan jong ka Sauramandala Foundation kan thaw 64 tylli ki jaka ai jinghikai ha ki thain nongkyndong ha kylleng ka jylla Meghalaya, hapoh ka lama jong ka Chief Minister’s Youth Center.