Ka jingiakhih ka BJP ka dei tang ban pynhun ia ki heh na Delhi

Ka Meghalaya Pradesh Congress Committee (MPCC) ka la kyntait war ia ki jingkynnoh ka BJP pyrshah ia ki nongialam ka Congress bad ki la pynpaw ba kim lah ban pdiang ia ka jingdawa ban panmap. Haba kren sha ki lad pathai khubor, u Secretary ka MPCC u bah Manuel Badwar, ula ong ba ka ri baroh kawei ki tip ba u Rahul Gandhi um dei u briew uba shu kynthoh kulmar hynrei u dei u nongialam uba sngewthuh ia ka lawei jong ka ri.U bah Manuel ula ong ba ka jingwan iakhih ka BJP hakhmat ka ophis Congress, ka dei tang ban pynhun ia ki heh na Delhi namar dang shen ki la wan pyllong ia ka jingialang ha nongbah Shillong.

“Ka jingkynnoh ka BJP ka dei tang namar ba ka la duh jingkyrmen bad ka la shah niat sha kyndong namar ba 140 klur u paidbah ka ri, ki la sdang ban iakren shaphang ka jingtuh vote ka BJP bad kim don jubab shuh halor ka jingtuh vote bad ki la sngewthuh ba ki la bakla,” ong u Secretary ka MPCC.Ula bynrap ba ka BJP mynta ka la poi ha ka kyllipmat ba ki la sdang ban tieng bad ki la shu wad daw bapher bapher ban kynthoh kynthoh ia ka Congress.

U Secretary ka MPCC ula ong, ba ka ishu ba eh mynta ha baroh kawei ka ri, ka long halor ka jingkyrduh kam bad ka jingleit ka spah ka phew tang sha ki kti jong ki khyndiat ngut. Kane ka dei ka buit ba ka BJP ka pyndonkam ha India baroh kawei bad kane ka juh ka buit ka sorkar jylla Meghalaya ruh ka pyndonkam ia kajuh ka lynti.Ula kynnoh ba ka rukom ialehkai ka BJP ban pynpait ia ki nongthep vote ha ka kyrteng ka niam, jaidbynriew, ym dei ban shah ialam bakla.“Ngi kwah ba ki paidbah ki dei ban sngewthuh ia kane ka jingtuh vote jong ka BJP,” ula bynrap.