Ka kyrteng ‘Purno’ ka mut “Pyndep Pura” bad ula pyndep ki kam kum u nongialam sain hima

Ki paidbah ka rilum Garo hynne ka sngi ki la iashim bynta da ki hajar ngut ha ka jingialang kaba la pynlong ha madan Rongrenggre ban rakhe ia ka lyngkhuh sngikha ba 78 jong u (L) Purno A. Sangma bad ia ka jingdap 13 snem ka seng saiñ pyrthei ka National People’s Party (NPP). Ha kane ka jingialang la wan ban iashim bynta da ki briew na kylleng ka thain shatei lammihngi bad na kiwei ki jylla ban ai burom ia u nongialam ba la khlad noh bad la rwai ia ka jingrwai ‘Oh Ang Aman Asong’ kaba la thaw da u Beston Momin, kaba la pynwandur thymmai da ka kynhun tem Nokpante-ia kaba la shim ba ka dei ka ‘Anthem’ jong ka NPP ha rilum Garo. Nalor kane la pynlong ia ka jingiakob rwai bad la pyllait paidbah ia ka kot lyngkdop bad la plie ia ka P.A. Sangma Photo Gallery bad la don ruh ka jingbuh syntiew ia une u nongialam uba la khlad noh, ia kaba la ialam da ka kurim ka jong u ka Soradini K. Sangma, ha ryngkat ka jingdonlang u Nongialam ba hakhlieh ka NPP u Conrad K Sangma u Myntri Rangbah ka jylla bad kiwei kiwei.

Kane ka jingrakhe ka dei ruh kum ka dak jong ka jingplie ia ka P.A. Sangma Museum Arena da u Myntri Sorkar u Marcuise Marak bad ha kane ka museum, la pyninam shaphang ka jingim, ka nongrim bad ka jingshemphang jong u nongialam ba la khlad noh, da ka jingthmu ban ai mynsiem ia ki samla bad ia kiba la noh ka rta.Nalor kane, la pynkup burom ia palat 300 ngut ki dkhot na ki seng sain pyrthei bapher kiba la pyniasoh sha ka seng NPP bad la pynkup burom ruh ia ki katto katne ki nongialehkai na rilum Garo kiba la ioh pdiang ia ka khusnam P.A. Sangma Achievers’ Award bad la ai khusnam kyrpang ia ka Soradini K. Sangma bad ia kiwei kiwei kynthup ia Sonelal Kol, N.K. Gauri bad Breston Momin, kiba la leh ia ka bynta kaba khraw ban pynwandur ia ka seng ha ki por ba la thaw ia ka.U Thangwang Wangham, State President ka Arunachal Pradesh NPP, ula ong ba u PA Sangma u dei u nongialam ba shisha jong ka thain shatei lammihngi bad ula kyntu ba dei ban nang pynkhlain ia ka seng.Katba u Symbud Myntri Rangbah ka jylla u Bah Sniawbhalang Dhar ula pynpaw ia ka jingbynniaw ba ym shim la ioh ia ka lad ban iatrei ryngkat bad u PA Sangma hynrei ula iaroh pat ia ka jingiohi jngai ka jong u kaba iai bteng ban pynwandur ia ka jylla Meghalaya.

U Lamphang ka iingdorbar thawain ka jylla u Thomas A. Sangma, ula ong ba u P.A. Sangma ula trei khlem shongthait na ka bynta ki jaidbynriew riewlum, kiba dang bat ia la ka tynrai bad na ka bynta ki jaidbynriew kiba shah ieh bein.U Myntri Rangbah ka jylla u Conrad K. Sangma, ula pynpaw ia ka jingshem shimet ka jong u ha ka jingleit synran ia la u Kpa ha ka por ba ki la leit ban thaw ia ka seng hapoh Manipur.Ula pynkynmaw kumno ba u kpa jong u u don ia ka jingngeit kaba skhem, wat haba ula sakhi ia ka jingthylli jong ka jaka pynlong jingialang, hynrei ula pynkylla pat ia ka jingtynjuh sha ka kabu.“U Purno u long u briew u bym shah ktah eiei ha ki jingtynjuh bad u dap kyrhai da ka jingmut kaba bha” ong u Conrad bad ka iaroh ia ka jinglong nongialam u kpa ba ka seng NPP ka la kiew kumba ka long mynta Ula pynkut ruh da kaba ong, “Ka kyrteng ‘Purno’ ka mut “pyndep pura” bad ula ong, “Hooid ula im ia ka jingim kaba pura bad kaba don jingmut ban pyndep ia ki kam kum u nongialam”.