Iasoi MoU ka Don Bosco bad ka Emporium Training & Consultancy ban kyntiew ki lad ioh kam ia ki samla

Ka Don Bosco Youth Centre (DBYC), Shillong kaba dei kawei na ki jaka ai jinghikai kaba la rim tam bad kaba lah ban shaniah bha ha ka jylla Meghalaya, ka la ia soi ia ka soskular bad ka Emporium Training & Consultancy Pvt. Ltd. (ETCPL) ban ai ki lad pyntbit bad ki lad ai kam ai jam ia ki samla kiba la nang la stad jong ka jylla.Naduh ba la sdang ia ka, ka Don Bosco Youth Centre ka la long ha khmat eh ha kaba pynkupbor ia ki samla, da kaba ai jinghikai ha ki bynta bapher bapher bad da ka la pynioh kam da ki spah ngut ki samla pule ha ki seng kiba pawnam man la u snem. La tip ia ka na ka bynta ka jingaiti jong ka ha ka jingpule bad ka jingpynroi ia ka sap ki samla, ka DBYC ka dang iai bteng ban long ka sharak jong ka jingkyrmen na ka bynta ki samla kiba wad ia ka jingroi ha ka kam bad ka jingim.

Ka ETCPL, ka jaka ai jinghikai ba pawnam jong ka ri India ha ki kam Aviation, Hospitality bad Cruise line, ka dei kaba la ithuh hapoh ka tnad pynroi sap bad ka kam seng kam seng jam, ka sorkar India, ka tnad National Skill Development Corporation (NSDC), bad ka Skill India International. La seng ha u snem 2007, ka ETCPL ka la pyniohkam ia palat shi lak ngut ki samla ha ka pyrthei. Lyngba kane ka jingiatreilang, ka ETCPL kan pynlong ia ka jinghikai ba iadei bad ka kam ha ka Don Bosco Youth Centre, Shillong, kaba pynkhreh ia ki samla pule na ka bynta ki Aviation, Hospitality bad Cruise line kiba don ha ki ri pyrthei. Yn pyniar ia ki lad ban ioh kam ha palat 20 tylli ki ri ha ka pyrthei, kaba plie lad ia ki samla jong ka Meghalaya.

Ki samla kiba angnud ban trei kum ki Cabin Crew, ki Airport Ground Staff, ki staff ha ki Hotel ba heh, lane ha ki liengsuiñ ba leit shabar ri, mynta ki lah ban pynïasoh bad ka ophis jong ka ETCPL kaba don ha Don Bosco Youth Centre, Laitumkhrah, Shillong ka ban sdang mynta u bnai September 2025. Kane ka MoU ka pyni ia ka mawjam kaba kongsan ha kaba kyntiew ia ka jingpynkhreh ban ioh kam na ka bynta ki samla jong ka Meghalaya.