Pyllait u Bah Paul ia ka thup Tamasa Synrai, ka Cherry Blossom ha Polo

U Myntri ka Tnad Jngohkai u Bah Paul Lyngdoh hynne ka sngi, ula pyllait ia ka Meghalaya’s Autumn Calendar 2025 ba dei ka almanak ban pynlong ia ki tamasa synrai bapher bapher ha jylla Meghalaya ban kyntiew ia ka kam jngohkai ha ka jylla. Ha ka jingialang kaba la pynlong ha Cabinet Room u Myntri ka tnad Jngohkai u Bah Paul Lyngdoh ha ka jingpyllait paidbah ia ka Meghalaya’s Autumn Calendar 2025 kaba kynthup ia ka jingpynlong ia ki tamasa bapher ha ka jylla kynthup ia ka Meghalaya Kayak Festival 14-18 tarik u Risaw, ka 7th Ahor 4×4 Offroad Challenge 23-25 tarik u Risaw, ka Shillong Cherry Blossom ha ka 14 bad 15 tarik u Naiwieng, ka Shillong Literary Festival 20-22 u Naiwieng, ka Me-gong Festival ha ka 28-29 tarik u Naiwieng bad ka Winter Tales ha ka 11-13 tarik u Nohprah. U Bah Paul ula pynbna ba ka Shillong Cherry Blossom Festival ka la pynkhreh ban pynshongshit lyngba ki nongrwai bad ka kynhun tem ba pawnam ha ka sngi kaba nyngkong ban kynthup ia u Jason Derulo, The Script bad ka Nora Fatehi, kaba la pynshongshit ia ki paidbah ha ka FIFA World Cup ba la long ha Qatar ha u snem, 2022.

Ula ong ba kan dei ha ka sien kaba nyngkong eh ia ka Nora Fatehi ban wan pynshongshit ha ka tamasa kaban long hapoh ka ri India. U Bah Paul Lyngdoh ula ong ba ka jylla kala bei tyngka T.23.50 na ka bynta ki tamasa bapher bapher ha u snem ba la dep, kaba kynthup ia ka Me-gong Festival, Shillong Cherry Blossom Festival, Literary Festival bad kiwei kiwei bad ka jingioh nong na katei ka jingbei kala long T.133.42 Klur. Ula pyntip ba ia ka Shillong Cherry Blossom Festival ka dei ka tamasa kaba la pynioh kamai bha ha u snem ba la dep, ha kaba ka sorkar jylla ka la bei T.5 Klur bad ka la iohnong haduh T. 59.98 Klur hynrei na ka bynta une u snem ka sorkar kan bei T.4 Klur bad ia kane ka tamasa yn pynlong ha Shillong ha JN Stadium. Nalor kane ula pyntip ruh ba ka sorkar kala kyntiew ia ka sap jong ki trai jylla lyngba ka CMJMP programme kaba long man la ka sngi, kaba kynthup haduh 7,000 ngut ki nongrwai ha kaba bun ki nonghtem bad nongrwai kila leit ban pyni ia la sap shabar jong ka jylla bad kin don ruh katto katne ki nongrwai bad nongtem kin leit ban pynbyrngia ha Singapore ha u bnai ban wan.

U Myntri ula pyntip ruh ba ka Tourism policy ka don ia ka thong ban kyntiew ia kane ka kam jngohkai ha ki liang bapher bapher bad hapoh jong ki 3 snem ban wan, yn iohi ba kitei ki jingbei tyngka kiba kongsan ha kaban pynbiang ia ki jaka sah ha kaba yn don sa 2 tylli ki 5 Star ha Umiam bad 2 tylli ha Sohra, ka Rain Museum kaban tei ha Mawsynram, Mawmluh Experiential Cave bad kine baroh kin iarap ha kaban kyntiew ia ka kam jngohkai. Ula ong ruh ba ka sorkar ka dang pynleit jingmut ha kaban kyntiew ia ki jingtei kiba iadei bad ka kam jngohkai bad ban pyniasoh ia ki shnong lyngba ki Tourism Circuit.