Mar T.3 lak yn iarap ka sorkar ia 55 ngut ki samla pule Hotel Management

Ka Sorkar Meghalaya hynne ka sngi ka la pynbna ban pyntreikam da ka Chief Minister Hospitality Scholarship Program. Ka Chief Minister Hospitality Scholarship Program kan dei na bynta 3 snem bad kan kyrshan ia ki samla pule BSC Hotel Management ha Institute of Hotel Management (IHM) Mawdiangdiang na ka bynta 55 ngut ki samla pule man u snem. Ia kane la pynbna da u Myntri ka tnat Tourism u Bah Paul Lyngdoh bad ula ong ba ka thong jong ka Chief Minister Hospitality Scholarship Program ka dei ban kyrshan ia ki samla ba pule Hotel Management hapoh Institute of Hotel Management (IHM) Mawdiangdiang.

Haba kren sha ki lad pathai khubor u Bah Paul ula ong, ba ka Sorkar ka la mang T.6,657,475  na ka bynta 165 ngut ki samla pule Hotel Management kata mar iwei na ki 55 tylli ki Block kiba don hapoh ka Jylla Meghalaya. “Ki samla pule Hotel Management ki dei ki nongshong shnong ba pura ka Meghalaya, ki dei ban pyndep ia ka eksamin Class XII da ka baba shim ia ka Subject English bad ka jingioh kamai ka longiing kam dei ban palat T.3 lak” la ong u Bah Paul. U la iathuh ba ka jingjied ia ki samla pule kan long katkum ka jinglah bad ka jingkwah jong ki lyngba ka State Level Selection Committee.

“Ia ka bai klas yn siew ka Sorkar Meghalaya bad ka jingkynshew pisa baroh ban kyrshan ia ki 165 ngut ki samla pule ha ki san snem kan long T. 6.6 klur. Kane ka mut ba ngin kynshew kumba T.3.6 lak ia uwei pa uwei u samla pule” ong u Bah Paul. Ula bynrap ki samla pule kin hap ban pynlut na lade tang ia ka bai hostel, ka bam, ka uniform bad kiwei ki jingdonkam.