Byrngem shong surok biang ki nongdie madan lada ym ioh CoV

Ki don da ki spah ngut ki nongshong die jingdie madan na ki thain Khyndai Lad ki bym pat ioh iaka Certificate of Vending (CoV) ban ioh shong die jingdie haki jaka bala ithuh kyrpang ka Sorkar. Ia kane la pyntip da u Assistant Secretary ka Meghalaya and Greater Shillong Progressive Hawkers and Street Vendors Association (MGSPHSVA) u Bah Shane Thabah. U Bah Shane ula iathuh ruh ba wat hadien ar bnai tam ba ki nongdie jingdie madan na Khyndai Lad kila iatreilang lang bad ka Sorkar ban leit shong noh ha Parking Lot MUDA hynrei haduh mynta ki dang don palat 100 ngut napdeng ki dkhot ki bym pat ioh iaka CoV. Ula kynnoh ruh ba haduh ki don bun napdeng ki bala shong die jingdie ha Parking Lot ki bym pat ioh iaka song pisa kaba T.20 hajar baka Sorkar Jylla kala kular ban iarap iaki nongdie jingdie madan.

“Hadien ba ngi la iatreilang bad ka Sorkar daka ba leit shong die jingdie ha Parking Lot MUDA ka Sorkar ruh kala kular ban pynmih biang iaka thup kyrteng jong kiba nongdie jingdie madan ki ban ioh die jingdie biang ha Khyndai Lad hynrei mynta la palat ar bnai ka Shillong Municipal Board (SMB) kam pat pyllait iaka thup kyrteng” la kynnoh u Bah Shane. U Bah Shane ula ong ruh ba ka Sorkar bad ka SMB kala leh khlem akar palat namar haduh mynta ki dang don bun ngut ki nongdie jingdie madan ki bym pat ioh iaka song pisa jingiarap kumba la kular daka Sorkar. “Hoid ki don kiba la ioh iaka song pisa hynrei ki dang bun pat ki bym pat ioh bad ki don bun ki daw, kynthup ka jingbym biang u phone number lane bakla ka Bank Account Number hynrei ka SMB ka lah dei ban pyntip ia kata, hynrei kala leh khlem akor daka ba shu sngap jar beit haduh mynta” ula ong.

Haba iadei bad kane ki nongdie jingdie madan na Khyndai Lad ki byrngem ban wan shong dukan biang ha surok Khyndai Lad naduh 29 tarik Nailur lada ka SMB kam pyllait iaka thup jong kito kiba dei ban ioh CoV. Kila pynpaw ba mynta la palat ar bnai 2 ki khlem ioh shuh ka lad ban bylla bad dei namar kane lada ka SMB ka sngap iaka jingeh jong ki, kim banse ban pynkhien iaka ain ban wan shong die jingdie biang ha surok. Naka liang ka Adviser jong ka MGSPHSVA, ka Kong Angela Rangad kala dawa ruh naka Sorkar ban tohkit halor ka jingslem ban ai iaki CoV shaki nongdie jingdie madan bad halor ka jingslem ban pyllait iaka song pisa jingiarap bala kular daka Sorkar Jylla.