Bun ki briew ki phai khmat sha ki lad jingsumar Ayush, ka sorkar kan pyniar ki jaka sumar ha Jylla: Ong u myntri ka koit ka khiah

U myntri ka tnat jong ka koit ka khiah ka sorkar Jylla u Wailadmiki Shylla haba shim bynta ban sakhi kum u kongsan ia ka lyngkhuh snem ba shiphew ka lad ai jingsumar Ayush ne 10th Ayurveda Day ba la pynlong da ka ophis treikam District Medical and Health Officer, West Jaintia Hills ha District Library Auditorium, Mynthong Jowai, halor ka phang Ayurveda for People & Planet, ula ai jingiaroh iaki lad ai jingsumar Ayush namar ba kat nangmih ki sngi kiba bun ki briew kila sdang ban phai khmat sha kane ka lad ai jingsumar, ym shuh kum haki por mynshwa ba ki ia beh tang ia ki lad jingsumar ba lah ban iohi kloi.U ong ym lah ruh ban len lehse ba don ki jingeh ba mih haka jingwad iaki lad jingsumar ba kham kloi, na kata ka daw bun ki briew ki phai shaki lad jingsumar Ayush.

Ha kane ka sngi u iathuh ba na ka liang ka sorkar Jylla ruh ka la ialeh ban pynheh pyniar ia kane ka lad ai jingsumar, ha kaba ym slem shuh yn plie iaka Ayush hospital ha Sohra, ka jingpyntrei iaka Ayush hospital ba 30 jingthiah ha Mookyndur, West Jaiñtia Hills ka dang iaid shakhmat bad ruh ka jingthmu ban wanrah ki kam pynroi ba iadei bad ka Ayush ha Rilum Garo ruh kala iaid shakhmat.U ong ruh ba ka Ayush kam dei tang shaphang ki lad ai jingsumar hynrei kaba iadei ruh bad ka rukom im, namar ha kine ki sngi ymdon kano kano ka dawai ba biang tam eh lait naka rukom ba biang ba bha ban sumar iaka met.

Haba iadei bad ki jingeh haka Jylla namar bym pat don ki jaka shna pynmih dawai lane ki pharmacy, kumta u kyntu iaki doctor ka Jylla ba kin mih shakhmat ban lam lynti ym ban shu kut tang haki jingai sumar.U ong ruh katno kan long ka jingkmen bakhraw lada ki briew jong ngi hi kin pyrshang, khamtam baka Jylla jong ngi dei kaba don shibun ki kynja dawai kynbat haki khlaw ki btapHa kane ka jingialang lehkmen lyngkhuh snem la donlang ruh u Deputy Commissioner ka West Jaiñtia Hills District u Abhinav Kumar Singh, IAS, ka Dr. P.Shylla, District Medical & Health Officer, West Jaintia Hills bad kiwei.