Mynta ka ilekshon jied CEM bathymmai ha KHADC

U Secretary ka Khasi Hills Autonomous District Council (KHADC) hynne ka sngi, ula pynbna ba yn pynlong ia ka elekshon ban jied ia u Chief Executive Member (CEM) ka Khasi Hills Autonomous District Council (KHADC) ha ka 30 tarik u Nailur ha ka por 11 baje mynstep.U Secretary ula pyntip ba kane ka elekshon ban jied ia u Chief Executive Member (CEM) ba thymmai ka KHADC kan long ha iing dorbar jong ka KHADC.

Lah ban ong, ka jingpynlong ia kane ka elekshon ka dei hadien ba u CEM ka KHADC u Bah Shemborlang Rynjah ula hiar shuki noh kum u CEM, namar ka jingbym don ha ka met ba koit ba khiah bad kumta ka Executive Committee ka la khyllem noh, hynrei katba ka Council kam pat ioh ia u CEM ba thymmai kumta u Bah Shemborlang un iai bteng ban treikam kum u Caretaker CEM jong ka Council.Ha ka sngi Palei, ki nongialam ka seng Voice of the Peoples Party (VPP) ki la shim ia ka rai ban pynkhamti ha u MDC ka Nongthymmai u Bah Winston Tony Lyngdoh ban iakhun ia ka elekshon CEM bad kumba long mynta ka VPP ka don 18 ngut ki MDC ha ka iing dorbar ba don 30 ngut ki MDC katba ka Liang Pyrshah ka don 12 ngut ki MDC.

Katba u Nongialam ka Liang Pyrshah u Bah Titosstar Well Chyne ula ong ba ki MDC ka Liang Pyrshah kim pat shim rai ban pynieng kyrtong na bynta ka elekshon CEM bad ula kitbok ia u CEM uba la hiar shuki u Bah Shemborlang ba un ioh ia ka met kaba koit ba khiah.Ka jingthep kyrteng ki kyrtong ban iakhun elekshon kan long ha ka 29 tarik Nailur por 12 baje mynsngi bad ka jingbishar bniah (Scrutiny) ia ki kot ki sla jong ki kyrtong kan long ha ka por 12:15 nohphai.