Yn pynlynguh ka kynhun tem na Ireland, ka AQUA, u Jason Derulu bad DJ Diplo ha ka Cherry Blossom

U Myntri Rangbah ka Jylla Conrad K Sangma hynne ka sngi ula pynbna ia ki kynhun tem bad ki nongrwai ban pynshongshit ha tamsa Cherry Blossom 2025, ha madan Polo ha ka 14 bad 15 tarik u Naiwieng.Haba iakren bad ki nongthoh khubor u Myntri Rangbah ula pyntip ha kane ka tamasa Cherry Blossom ki nongrwai bad ki kynhun tem ba pawnam ka pyrthei ki ban pynshongshit ia ki paidbah kynthup ka kynhun tem na Ireland ba la tip kum ‘The Script’, u khlur R&B u Jason Derulu, u DJ Diplo uba la jop lai sien ia ka Grammy, ka kynhun pop ba pawnam AQUA bad ka Nora Fatehi ka aktres ba pawnam ka Bollywood.Nalor kitei, kin don ruh ki kynhun rwai bad tem kum ka Meba Ofilia, Dappest and Adl, ka kynhun Girish and the Chronicles (GATC) bad Arius kin pynshongshit ia ki paidbah ha ka tamasa Cherry Blossom.

Kan don ruh ka ai burom kyrpang ia u nongrwai ba pawnam u Zubeen Garg ha ka 15 tarik Naiwieng ka sngi ka baar ka tamasa, ia kaba yn wan ban rwai ki kaitor ba iajan bad une u khlur nongrwai ba la khlad kynthup u Zublee, Priyanka, Prabin bad Arupjyoti.Ha kane ka tamasa yn pynlong ruh ia ka jingiakob Mr & Ms Cherry Blossom, Cosplay bad Cherry Blossom Arm Wrestling bad ia ki tiket lah ban shu thied online bad na ka Box Office ha Shillong.U Myntri Rangbah ula ong ba ka tamasa Cherry Blosson mynta u snem, kan long ka jingleh kmen kaba heh ha ka rwai bad ka tem ka put, ka kolshor ba pyni ia ka jingdon bun ki nongshong shnong bad ki tynrai bapher jong ka jylla.

Ula pynpaw ruh ia ka jingkhmih lynti ba palat 50,000 ngut ki nongwankai kin iashimbynta ha kane ka tamasa bad u don ia ka jingkyrmen ba yn lah ban tam ia 50,000 ngut ha ka jingwan jong ki nongjngohkai na kylleng ki jylla.Halor ki jingkynnoh ba ka sorkar kala pynlutkai ia ka pisa da kaba pynlong ia ki tamasa, u Myntri Rangbah ka Jylla ula pynksan ba ka jingpynlong ia ki tamasa kynthup ia ka Shillong Cherry Blossom Festival kala pyniohnong bha na kaei kaba la bei ia ka tyngka.“Kumba T.20 klur tam ne duna ngi la pynlut ha ki tamasa u snem ba la dep bad ngi la ioh nong jan T.130 klur tam. Kine ki dei ki jingkhein ba shai ba pyni ba ki concert bad tamasa ki dei kiba ioh nong bha bad ki la pynshisha ba ki lah ban ai kam bad rah ia ka nam jong ka Jylla” la ong u Conrad.