Ha ka Golden Jubilee ka tamasa tem ksing Wangala kan kiew sha ki 1000 ki nongtem ksing

U Myntri Rangbah ka jylla u Conrad K. Sangma hynne ka sngi ula leit ban shim bynta ha ka jingplie ia ka 49th Hundred Drums Wangala Festival ha Wangala A’dam, Chibagre ha West Garo Hills. Ha kane ka prokram la wan iashim bynta lang da ka MLA ka Gambegre ka Mehtab Chandee Agitok Sangma, u Superintendent of Police ka West Garo Hills u Abraham T. Sangma, Chief Secretary Dr. Shakil Ahammed nalor kiwei de ki heh sorkar. Haba kren ha kane ka sngi, u Myntri Rangbah ula ai khublei ia ki kynhun bapher bapher na kylleng ka jaka jong ka thain Rilum Garo kiba la wan iashim bynta ha kane ka jinglehkmen bad ula ai khublei ia ka Committee kaba la pynlong ia kane ka jingrakhe na bynta ban pynneh pynsah ia ka riti dustur jong ki paidbah Garo. Ula ong,” Ki briew na kylleng ki jaka jong ka ri ki ialum lang man u snem ba kin ngam jylliew halor ka kolshor ka riti dustur jong ki paidbah Garo.”

U Myntri Rangbah ula ong ruh ba ka jingpyntrei ia ka surok ban leit sha Wangala A’dam, ka jaka ba pyllong ia ka tamasa la mang haduh T.20 klur bad ka jingpyntrei ia ka kam ka la sdang shakhmat. “Ynda la dep kane ka surok ban leit sha katei ka jaka, kan pynsuk ia ki paidbah bad ia ki nongwan jngohkai ban poi sha ka tamasa.Ula ong ruh ba la shem snem ha ka jingrakhe ia ka jubili ksiar ne ka Golden Jubilee jong ka 100 Drums Wangala Festival, ka sorkar jylla kan ai jingkyrshan khnang ban pynphuh pynpieng bad bad pynlong ia kane ka jingrakhe kaba heh. Ha kajuh ka por, ula ai jingmut ban thaw ia ka State Level Committee ban pynlong ia kane ka jingrakhe bad bynrap lyngba ka jingiarap jong ka sorkar, ka jingrakhe ia ka jubili ksiar kan long kaba jop bad kaba heh. “U PA Sangma (Bam kwai ha dwar u Blei) u don ia ka jingiohi ba kane ka tamasa kan kiew sha ka 1000 tylli ki Drum Wangala. Nga tikna ba ka jingrakhe ia ka golden jubilee ruh kan long ka phuh kaba heh bad kaba jop,” ula ong.

U Myntri Rangbah ula pyntip ruh ba ka sorkar jylla ka la shim ia kiba bun ki sienjam na bynta ban kyntiew ia ka kolshor ban pynneh ia ka riti dustur bad ban pynsah nam ia ki jingdon jingem naduh hyndai hynthai.U la pyntip ruh ba la thaw ia ka committee na bynta ban wad bniah ia ka jingiaid lynti jong ki riewlum Garo na Tibet.“Ngi la thaw ia ka committee ban wad bniah ia ki riewlum na ka jylla Meghalaya bad ba kin thoh ia ka jingiaid lynti jong ki jaidbynriew Garo na Tibet bad ki Khasi bad Jaintia na Vietnam bad Cambodia.Katba u Chief Secretary u Dr. Shakil Ahammed, ula ban jur halor ka jingdonkam ban iada bad ban pynneh pynsah ia ka kolshor, ka jinglehniam tynrai ha kane ka juk iaid sted ba mynta. Ula kyntu ia ki samla ba kidei ban bat bad pynneh ia la ka riti dustur bad kumjuh ia ka mariang. Ha kane ka sngi, la pynphuh pynpieng ia kane ka tamasa da ka jingrwai jingshad na ki samla pule ka NEHU, Tura bad kiwei de.