Pyrshah jur ki Trai Trok ia ka rai jong ka JHTOA ba ai por tang 4 sngi

Hadien ba ka Executive Committee jong ka Jaiñtia Hills Truck Owner Association (JHTOA) ha ka sngi Saitjain, kala pynbna khot pynthymmai biang iaki kali hapoh ka seng JHTOA naduh ka 17 tarik mynta u bnai, hynne ka sngi pat shi kynhun ki trai trok kiba don bynta hapoh ka JHTOA kila lum jingialang ban pyrshah jur halor katei ka jingpynbna. Kane ka kynhun ki trai trok kala pyrshah ia katei ka jingpynbna bad pynpaw baka dei kaba lyngkot por palat, nalor ba la shim rai tang da ki katto katne ngut khlem da sngap lem ia ka sur uba bun ba lang lyngba ka jingialang paidbah. Kumta kila dawa ban pyndam shwa ia katei ka jingpynbna bad ban pynbna da kawei pat, nalor ban pynjrong ia ka por khnang ba ki trai kali kin ioh ban pyndep ia ka kam.

U Bah Balen Thubru uwei na ki trai trok ula ong, ka jing aipor ba tang khyndiat sngi lah ban don ka jingthmu ba sha lyndet jongki nongialam, namar la sngewthuh shai ba ki trai trok tang hapoh kine ki khyndiat sngi kin ym lah ban pyndep bad halor kane ka jingpyrshah jongki, ula ong ba kila dep phah jingthoh sha ki nongialam ka seng JHTOA ba kin pynjynsur ia ka por, da kaba ai jingthoh ruh sha u DC. Ha kajuh ka por, kila dawa ruh na u President JHTOA ban khot ia ka jingialang paidbah ne General Meeting hapoh u bnai Nohprah mynta u snem  bad lada um khot kin sa ia lum hi para trai trok kumba ki ialum mynta ka sngi.

U Bah Balen Thubru ula ong haba don jingialang ka JHTOA kim juh khot lang ia kiba bun balang ki trai trok, hynrei la shong jingialang bad rai tang katto katne ngut bad iaka rai pynbna ban pynthymmai biang iaki kali hapoh ka JHTOA ruh la rai tang da ki 3 ngut 4 ngut nalor ba ki buh ka por ba lyngkot, ha kaba ki President bad nongialam ba mynshwa kim juh leh kumne hynrei ki ai kylluid ia ka por haduh 2 ne 3 bnai. Katba u Bah Pynshngaiñ Papang ula ong “Ngi kwah ba kano kano ka rai kaba dei na ka bynta uba bun balang dei ban rai da ka General Meeting ym ban shim rai hi tang da ki katto katne ngut ki dkhot ka EC”.