Shimkhia ka shnong Urkaliar ban tehlakam kiba die kyiad be-aiñ

Ka Shnong Urkaliar kaba don hapdeng jong ka shnong Nongmensong bad Demseiniong, kadei kawei na ka shnong kaba ju shah pynbudnam kum kawei na ki ktem ba jur ka jingdie kyiad beain. Halor kane, u Secretary ka shnong Urkaliar u bah Samborlang Diengdoh ula kubur ba ka shnong Urkaliar ka jur ka jingiadie iathied kyiad be-ain, hynrei ula pynshai ba ka jingdie kyiad be-ain ha kane ka shnong kam dei ba la leh da ki briew na kane ka shnong hynrei kidei ki briew na kiwei pat ki shnong.Katkum ka jingiathuh u bah Samborlang, ha kane ka shnong ki don kumba 18 tylli ki trai jaka bad ki don haduh 7 tylli ki Wine Store ba la ai NOC da ka shnong.

U Bah Samborlang ula iathuh ba ka shnong Urkaliar mynshwa ha ki snem 2014 kadei ka shnong kaba la thnem bha ha ka iew die kyiad, hynrei naduh ba ula shimti kum u nongkitkam shnong, ha u snem 2017 ula sdang ban pynbeit ia kane ka kam da kaba lum ia baroh ki trai jaka, ki trai dukan ban pynbeit ia kane ka jingeh. “Nga la lum ia baroh ki trai jaka bad khamtam ia kiba donkti ha ka jingdie kyiad be-ain, hynrei kawei na ka daw ba ki pynmih, ka long ba ki donkam ban bsa khun. Nga la ai jingmut ia ki ba kan bha ba kin plie da ki dukan kyiad ba don da ka lisen, namar ba la pyniaid da ka ain bad kidei ban bud ryntih ia ka por plie naduh 10 baje mynstep haduh 10 baje janmiet, katba ki dukan ki Restaurant die kyiad la aipor tam shi kynta ban khang na katei ka por ba la buh kata ka long haduh ka por 11 baje janmiet,” la iathuh u bah Samborlang.

Ula iathuh ba ki trai shnong ki trai dukan baroh ki bud ryntih ia kane ka por ba la buh hynrei palat ia ka por 11 baje janmiet, ki briew kiba die kyiad be-ain kim dei na kane ka shnong kidei ki briew na kiwei pat ki shnong. Halor kane ka jingwan die be-ain ki briew kiba nabar, na ka liang jong ka shnong kala shim da ka sienjam kaba tyngeh pyrshah ia ki, ha kaba kila ujor ruh da ka ejahar pyrshah ia kitei ki briew ban bynrap na ka shnong kala pynieng da ki kor CCTV ban iohbat ia ki kali kiba wan ieng ban die kyiad be-ain ha kane ka shnong.