Leit rung Congress biang u MLA barim ka South Rura

U MLA barim ka South Tura constituency u John Leslee K Sangma hynne ka sngi, ula leit phai bad pyniasoh biang ialade sha ka seng Congress hashwa ban long ka elekshon MDC jong ka Garo Hills Autonomous District Council (GHADC). La pdiang sngewbha ia u John Leslee sha ka seng Congress, da u President ka MPCC u Bah Vincent H Pala ha ryngkat ka jingdonlang ki nongialam bad ki nongkitkam ka seng Congress.

Haba kren ha ka jingialang u Bah Pala ula ong “Ngi sngewkmen ban pdiang sngewbha ïa u John Leslee K Sangma sha ka iing ka sem jong ka Congress bad ka jingwanphai biang jongu ka long ka khubor sha ka BJP bad NPP kiba wanrah ia ka Politik jong ka jingiapher hapoh ka thaiñ Garo Hills”. Ula ong ba ka jingwanphai jongu John Leslee kadei ruh ka sienjam ba ka Congress kala khlaiñ biang mynta bad lyngba ka jingshemphang bad ka jingiajan u John Leslee bad ki paidbah kan nang pynkhlain shuh shuh iaka Congress ha rilum Garo.

U John Leslee haba ula iasyllok bad ka iaphylliew jingmut bad ki riew rangbah, ki nongkyrshan bad ki kynhun kynhun bapher, kumta ula shim ia ka rai ban leit phai biang sha ka Congress. U John Leslee ula pynpaw ïa ka jingsngewkhia kaba jur halor ka jingeh kaba la nang jur ha rilum Garo bad ula kdew ba ki samla ki ïakynduh ïa ka jingeh ha ka  lawei ka jongki, da ka jingbym donkam donjam, ka jingduh jingkyrmen bad kila nang duna ruh ki lad ki lynti ban kyntiew para briew.