Leit jngoh u Election Commissioner ia u Lum Sohpetbneng

U Election Commissioner ka India, u Dr. Sukhbir Singh Sandhu hynne ka sngi ula leit jngoh bad buh jingduwai kyrpang ha ka jaka kyntang, ha u Lum Sohpetbneng. U Dr Sukhbir ula leit ryngkat bad la ka kurim bad la synran ia ki da u Deputy Commissioner ka Ri Bhoi District u Abhilash Baranwal bad u Chief Electoral Officer ka Meghalaya u Dr. BDR Tiwari. Haba u Dr Sukhbir ula poi ha kane ka jaka, la pdiang sngewbha ia u da ki nongmihkhmat jongka Seng Khasi Kmie kiba kynthup ia u Bah DL Nongbri uba long u Vice President, u Bah PB Synrem u Assistant General Secretary, ki dkhot jongka Jylli Pyrkhat Kam bad ka Lum Sohpetbneng Committee.

U Election Commissioner ula leit sha ka jaka ba kyntang ne ka ‘Sacred Sanctum Sanctorum’ ban buh jingduwai kyrpang bad ban pan ia ka jingkyrkhu na u Blei nongbuh nongthaw. La ai sngewbha ruh ia u Dr Sukhbir ia ka kot kaba batai ia ka jinglong kyrpang jong u Lum Sohpetbneng bad ka rukom im jong ki Khasi. U Dr Sandhu ula iakren bniah bad ki rangbah jong ka Seng Khasi, ha kaba iadei bad ka jinglong kongsan jong ka kolshor bad ia ka jinglong bad ia ka jingdon nam jong kane ka jaka kyntang jong u lum Sohpetbneng.

U Election Commissioner ula ai khublei ia ka jingriewspah jong ka riti ka dustur tynrai bad ia ki jinglong kiba kordor kiba la bat, iada bad pynneh pynsah da ka Seng Khasi.