Sdang ka Shillong Literary Festival

Ka Shillong Literary Festival kaba 5 kaba la long ha Nan Palok, kala sdang hynne ka sngi ha kaba kala khring ia ki 60 ngut ki nongthoh poitri kiba pawnam, ki nongthoh, nongshna phlim bad ki khraw pyrkhat pyrdain na kylleng jong ka ri India bad ka pyrthei ban wan iashimbynta ha kane ka tamasa ka thoh ka tar. Ha ka jingplie ia kane ka tamasa ka thoh ka tar la wan ban iashimbynta da ki nongjop ia ka International Booker Prize kiba kynthup ia ka Banu Mustaq bad Francesc Miralles, ryngkat ka jingdonlang ka Malavika Banerjee, u Commissioner ka tnad Jngohkai u Vijay Kumar D bad u Commissioner & Secretary ka Sorkar Meghalaya u Bah Cyril V. D. Diengdoh bad kiwei kiwei.

Ha ka sien ka banyngkong eh, kane ka tamasa kala buh kyrpang ia ki bynta ha kaba iadei bad ka litreshor jong ka Khasi bad Garo ha kaba ki nongthoh kiba pawnam kum ka Kong Streamlet Dkhar, Janice Pariat, Aiyinti Nongbri, Barbara Sangma bad Colnat B. Marak kila wan iashimbynta ha kaba la iadonlang ruh u Nongshna phlim Garo u Domnic Sangma, ki tyngshop kiba pawnam kiba kynthup ia u Rajat Kapoor bad Vinay Pathak bad u nongtem ba pawnam u Gino Banks kiba la pynkhreh ban iashimbynta ha kane ka tamasa. Kane ka tamasa kaba 3 sngi kan bteng ban long mynta ka taiew ban rakhe ia ka litreshor, kolshor bad iaka bor jong ka jingiathuh khana ha ka dohnud jong ka nongbah Shillong. Haba ai jingkren, ka Banu Mustaq kala iaroh ia ka Shillong bad ka ong, ba kane ka tamasa ka ioh ban pynrung ia ka lynti jong ka jingitynnad ki jaka kiba la pynwandur ia ka litreshor.

U Miralles ula ong, ba ka Shillong ka long kum ka paradais kaba rit ne “little paradise” bad u khmih lynti ia ka halor ka jingiakren halor ka kot ‘Ikigai’ bad ka kot thymmai ka jongu kaba la tip kum ka Namaste. Ka Malavika Banerjee kala batai shaphang ki prokram bad ka pynpaw ba mynta ka kynti ka iashoh bha bad ki sur kiba la ioh jingithuh ha ka pyrthei ryngkat bad ka jingkhlain jong ka jingsngew jong ka jingmihkhmat ia ka thain. Kala ong “Kane ka tamasa kadei kaba la pynwandur ban shakri ia ka jaka ban long ka jingiasyllok kaba don jingmut ban ia ka jingiatai nia”.