Pynhap pyrda u Conrad ia ka jubili rupa ka SSYWO

U Myntri Rangbah ka Jylla u Conrad K Sangma ryngkat bad u Myntri ka kam Jngohkai u Timothy D Shira hynne ka sngi ki la pynhap pyrda ia ka jingrakhe ia ka Jubili Rupa jong ka San Shnong Youth Welfare Organisation (SSYWO) ka kynhun kaba khmih bad pyniaid ia ka Elephant Falls. Haba kren ha ka jingialang u Conrad K Sangma, ula ai khublei ia ka SSYWO halor ka jingkynjoh ia u mawmer jong ka jingdap 25 snem bad ula ong ba ka long kaba sngewhun ban ioh ia ka jingjop jong ka imlang sahlang da ka jingiawan lang na ka bynta kajuh ka jingthmu.“Watla ka jingiaid lynti ka SSYWO kala long kaba eh hynrei ka jingrakhe mynta ka sngi kadei ka nuksa ban pyni ia kaei kaba lah ban pynurlong haba ka don ka jingiatreilang bad ka jingpynleit jingmut ia ka jingthmu” ula ong bad ka bynrap, “San Shnong ka ieng na ka bynta 5 tylli ki shnong ne 5 tylli ki shympriah kti jong ka kti hynrei haba ki 5 tylli ki shympriah kti ki iawanlang ka pynmih ia ka jingkham ia ka kti kaba mihkhmat ia ka bor bad ka jingiatylli”.

U Myntri Rangbah ula iengskhem ruh halor ka jingkular bad ka jingpynleit jingmut ka sorkar ha kaba iadei bad ka kam jngohkai pyrthei kum kata ka bynta kaba bun bha ki kabu, jingpynneh pynsah bad jingkylla bad ka bynta kaba kongsan bha kum kata kaba don byntalang ha ka jingiohi jngai ban kynjoh ia ka ioh ka kot kaba $Billion.“Nga dap da ka jingkmen ban pyntip ba ha kine ki 7 snem shiteng kiba la dep, ngi lah iaid suki ha kata ka lynti hynrei ban wanrah ia ka jingkylla kan shim ia ka por hynrei kumba ka long mynta kila don kumba 240 tylli ki project kaba ka jingkynshew tyngka kala kot ia ka T.3900 klur ha katei ka bynta,’ ula ong bad ka pyntip ruh, ia ki katto katne ki projek kiba kongsan kiban dang wan kiban pynwnadur thymmai bad wanrah ia ka jingkylla ia ka kam jngohkai pyrthei hapoh ka jylla bad ka banjur ia ka jingtuklar kiba kongsan jong ka sorkar ban kyntiew ia kane ka liang.U Myntri Rangbah ula ong, ba ia kano kano ka kam ban long kaba seisoh bad kaba iaineh ka jingiashimbynta jong ka shnong ka thaw ka long kaba kongsan bha.

“Ka bor kaba khlain tam ha ka jylla ka jong ngi kidei ki shnong ki thaw bad lada ngi lah ban iatreilang ryngkat bad ka jingbei tyngka ka sorkar sha ka PPP mode, kane ka model kan plie ia ka ioh ka kot kaban neh shirta kaba ka jylla ka don” ula ong.Haba jubab bad ka jingsngewkhia halor ka jingbym biang ki jingdonkam ki painkhana ha Elephant Falls, ula ong, ban don ia ki painkhana kiba khuid kadei ka bynta kaba kongsan tam ha ki jaka jngohkai kadei ka mat kaba kongsan bha jong ka tand jngohkai bad ula pyntip ba ia ka painkhana ha Elephant Falls yn sa tei lyngba ka jingkyrshan lyngba ka Corporate Social Responsibility (CSR).U Myntri Rangbah ula pynkup burom ruh ia ki dkhot kiba la seng ia ka SSYWO ha katei ka jingrakhe khamtam haba ka Elephant Falls mynshwa kala long kum ka ktem jong ki kam sinew hynrei mynta kala kylla long kum ka jaka jngohkai kaba pawnam ha ka jylla da ka jingiatreilang jong ki samla na ki 5 tylli ki shnong kiba don ha katei ka thaiñ.