Na u Modi yn phah tuklar ka Sorkar Meghalaya ban pyllait iaka pisa jong ka skhim JJM

Ka Sorkar Jylla ka la rai ban kynduh ïa u Myntri Rangbahduh ka ri u Narendra Modi ban phah tuklar ban pyllait palat T.700 klur tyngka na ka bynta ban siew ia ki Bill kiba dang sahteng sha ki Contractor ba pyntrei ia ki projek Jal Jeevan Mission (JJM) ha Meghalaya. Ïa kane la pyntip da u Myntri ka tnat Public Health Engineering (PHE) u Marcuise N Marak haba jubab iaka jingdawa ka All Jaintia Contractor and Supplier Association (AJCSA) ban pyllait iaka pisa ban siew ia ki Bill jong ki Contractor ba pyntrei iaka skhim JJM ha Meghalaya.Haba kren shaki lad pathai khubor u Myntri u la ong “Ka Meghalaya ka dei ka jylla Khristan bad ka dei ka kamram naka liang ka Sorkar Jylla ba ngin shimkhia ïa la ki jong ki briew, haba pyrkhat ïa kata, ngin sa buddien bad ialeh ban pynngeit ïa ka Sorkar India ba kan pyllait noh ïa ka pisa sha baroh ki Jylla Khristan kynthup ïa ka jylla Meghalaya”.

U Myntri u la pyntip ruh ba dangshen u Myntri Rangbah ka jylla u Conrad K Sangma u la kynduh ïa u Myntri ka tnat Jal Shakti ka Sorkar Pdeng u CR Patil bad la aiti ruh daka dorkhas halor ka jingslem ban pyllait iaka pisa ban siew iaki Bill jong ki Contractor ba pyntrei iaka skhim JJM ha Meghalaya.“Lada jia ba ka Sorkar Pdeng ban leh eiei halor kane, nga la dep ong ia u Myntri Rangbah ba ngi dei ruh ban iakynduh ia u Myntri Rangbahduh ban phah tuklar” u la ong.U la ïathuh ba ka jingslem ba ioh iaka pisa naka Sorkar Pdeng haba iadei bad ka skhim JJM kam dei tang ha Meghalaya hynrei jan baroh ki Jylla hapoh ka ri India haduh mynta kim pat ioh iaka pisa.

“Ki Bill jong ka skhim kaba kot sha ka T.700 klur ba hap siew shaki Contractor kadei ban ioh naka Sorkar Pdeng hynrei haduh mynta ka Jylla lem bad kiwei ki Jylla jong ka ri kim pat ioh namar kata ngim lah wat ban pynbor iaki Contractor ban trei tyngeh ban pyndep iaki kam. Kumta don ki kam kiba la sahkut” u la ong.Haba pynpaw ba palat 83% ka skhim JJM la dep pyndep hapoh ka jylla, u Myntri u la ong ba ka Sorkar Pdeng kala pynjlan ban pyndep iaka skhim haduh u snem 2028. “Ka sorkar India ka la bthah ïa baroh ki Jylla halor ka jingdonkam ban pynduna ïa ka jingpynlut kaba la palat ïa kaba la mang” u la ong.