Sdang ka tamasa Amur Falcon ha Umtngam ban pynneh ia ki khlieng Lamaha

Ka long shisha ka jingkmen kaba khraw ym tang ia ki paidbah ka Mawhati Konstituensi hynrei wat ia ka district hi baroh kawei ha kaba mynta ka 5 tarik Nohprah, la lah ban plie paidbah biang ia ka tamasa bna nam kane ka thaiñ kaba la tip kum Amur Falcon Festival ka tamasa ban pynsahnam ia ka jingwan iuhkjat ne shongthait shipor jong ki klieng lamaha ne Amur Falcon ha ka thaiñ Mawhati.

Ia kane ka tamasa ba la plie pyrda mynta ka sngi ha ka shnong Umtngam, la pynlong da ka Brup Hanglang Tourism Promoting Society, la wan ban plie paidbah da u Dr. Celestine Lyngdoh, MLA ka Umsning Constituency kum u kongsan, ha ka jingiadonlang ruh u MLA ka Mawhati u Bah Charles Marngar, u Deputy Commisioner ka Ri Bhoi District u Abhilash Baranwal nalor ki nongkitkam jong ka Society.

Kum ban shu kdew hangne, kine ki sim khlieng kiba la tip kum ki Amur Falcon ki dei ki sim kiba na ka ri South-eastern Siberia bad Northern China bad kiba ju wan her da ki kynhun kiba la kot da ki lak sha ka Ri India khamtam ban wan iuhkjat ha ka thaiñ Mawhati bad nangne na district kin her pat sha jylla Nagaland kaba dei ruh ka jingiaid lynti kaba khatduh jong kine ki sim hashwa ban leit phai pat sha la ing.

Haba kren ha kane ka jingplie ia ka tamasa, u Dr. Celestine Lyngdoh kum u kongsan u la ai ia ka jingiaroh kaba khraw sha ki nongpyniaid ia kane ka tamasa halor ka jingiohi jngai ka jong ki ban pynsahnam ia kane ka jingwan iuhkjat jong kitei ki sim na ri nongwei, khamtam ka jinglong kaba ia tylli jong ki paidbah ha kaban rai ban nym pyniap ne ban pynmynsaw ia kitei ki jait sim kaba long ruh ka nuksa kaba bha ia kiwei pat kumno ban burom ia ki mrad ki mreng bad ia ka jinglong jingman jong ka mei mariang hapoh kane ka thain khamtam ia kito kiba don jingma ban lah ban duhjait noh.

U la ong ruh, ba ka jingjied jong kitei ki sim Amur Falcon ban wan iuhkjat ha kane ka thaiñ Mawhati ym sha kiwei kiwei pat ki jaka jong ka jylla Meghalaya ka la pynpaw shynna ia ka jinglong jingman jong kane ka thain kaba long shisha ka mariang kaba itynnad bad kaba bit na ka bynta ka jingwan iuhkjat jong kine ki sim kiba her da ki phew hajar kilomiter ha ki por tlang bad kane ka thain ka don ruh ia ka jingkyrmen kaba khraw ban kiew ha ki liang jong ki kam jngohkai pyrthei, u la ong.

“Ki don bun ki lad ki lynti kumno ban kyntiew ia ka ioh ka kot bad ruh ia ka roi ka par ha kane ka thain, namar kane ka thain ka dei kaba dap shisha da ka sboh bad ruh ka ngap namar la sakhi ia kane ka thain ba ka long kaba lah ban leh ia kiba bun ki kam pynroi khamtam ha kaban pyntreikam ia ki skhim sorkar”, ong u Dr. Lyngdoh.

La pynshongshit ruh ia kane ka tamasa da ki jingtem jingput bad ki jingshad, yn pynkut ia kane ka tamasa ha ka 6 tarik Nohprah ha ryngkat ki jingpyrngia ba bunjait.