Ha iing Dorbar thymmai rakhe Khristmas ki Nongïalam bad MLA ka jylla

Ki nongialam sain hima ka jylla ha ka sngi Saitjain ki la pynlong ia ka jingrakhe Khristmas bad Snem Thymmai ha phyllaw ka Iingdorbar thawain thymmai ha Mawdiangdiang, Shillong. Ha kane ka jingrakhe la iashim bynta da u Myntri Rangbah ka jylla u Conrad K Sangma, u Lamphang u Thomas A Sangma, u Deputy Speaker u Limison D Sangma bad u Symbud Myntri Rangbah u Sniawbhalang Dhar, u Myntri Sorkar u Bah Metbah Lyngdoh bad ki MLA kynthup ia ka Kong M Ampareen Lyngdoh, Bah Ronnie V Lyngdoh, Bah Paul Lyngdoh, Bah Alexander Laloo Hek, ka Miani D. Shira, u Mizanur Rahman Kazi, Bah Matthew Beyondstar Kurbah, u Mar-thon Sangma, Bah Synshar Lyngdoh Thabah, Bah Ga-vin Miguel Mylliem bad  Bah Pius Marwein. Haba kren ha ka jingialang u Thomas A Sangma u la ong, kane ka dei shi bynta ka jingkmen ban rakhe ia ka Khristmas ha Meghalaya Legislative Assembly ba thymmai bad ka Khristmas ka dei ka por ban khmih ia lade bad ban pynthymmai kaba pynkynmaw ia paidbah ia ka jingieid jong u Blei bad kaba ai mynsiem ia baroh ban pyniar ia ka jingsbun, jingsngewthuh bad jingleh isynei ia kiwei pat.

U Lamphang ula pynpaw ia ka jingkyrmen ba ka jingshai u Khrist kan iarap ban btin ia ki jingmut jingpyrhat ban shakri ia ka imlang sahlang bad ula ai khublei ia baroh ki MLA ba la iashim bynta ha ka prokram. Katba u Limison D. Sangma ula ong, wat la ka Khristmas ka dei kaba don ia ka jingia dei kaba jylliew bha ha ka niam, hynrei katba nangiaid ki por ka la kylla long kum ka jingrakhe ha ka pyrthei baroh kawei ban iakmen, ia ieid bad ban don ka jingkyrmen kaba ai mynsiem ia ki briew ban iasam lang ia ka jingsbun, jingnoh synniang ia kito kiba donkam.  U Bah Andrew Simons, Commissioner and Secretary, ka Meghalaya Legislative Assembly ula ong, ba ka Khristmas ka long kum ka jingpynkynmaw ia ka jingkordor ka jingieid, jingsuk bad ka jingleh isynei bad ka jingdon mynsiem para briew. U la ong ba ka khubor jong u Trai Jisu Khrist ka ieng kum ka dak jong ka jingkyrmen ia ki briew bad ka khot ia baroh ban shakri da ka jingkylluid mynsiem, ban tei ia ka jingiadei bad ka jinglong shipara ha ka imlang sahlang.

Katba u Neil Vimal Kumar u Ministry Director jong ka Life Focus Society, Chennai, ula sam ia ka khubor Khristmas bad buh jingduwai ha kane ka jingialang.Ha shwa kane, la pynlong ia ka jingduwai kyrpang, da ka jingsdang ia ka jingpule na ka Bible da u BA Sangma, Manager jong ka Assembly Press. La ioh ruh ia ki jingrwai kyrpang na ki khynnah jong ka Children of God’s Dream Children’s Home, Lumshyiap, Langkyrding, ka Meghalaya Legislative Assembly Choir bad ka Mahila Band jong ka Nagaland Police ne ka 15th NAP (IR) Mahila Band kaba dei ka kynhun tem jong ki pulit kynthei na Nagaland kaba la ioh ia ka jingithuh ha ka ri  bad ioh rung sha ka Final jong ka India’s Got Talent (IGT) Season 10 ha u snem 2023 ka la pynshoh biej ia baroh ha kane ka jingialehkmen bad la ioh ruh ka jingot ia u Cake Christmas.