Ngi lah bthah ia ki BSF bad pulit ban peitngor ha khappud Bangladesh: Prestone

U Symbud Myntri Rangbah ka jylla u Bah Prestone Tynsong ula pynpaw ka jingsngewsih halor ka jingshah lute ki 5 ngut ki nongshong shnong ka Umniuh Tmar ha ki nong Bangladesh bad ula ong, ka sorkar jylla ka la bthah ia ki shipai Border Security Force (BSF) bad ia ki pulit ban peitngor ha ki thain khappud bad ka ri Bangladesh.

“Ka jingjia ha Umiuh Tmad ka long kaba sngewsih bad na ka liang ka sorkar jylla ryngkat bad u Inspector General BSF, ngi lah shong jingialang ban iakren ym tang kaba jia ha Umniuh Tmar hynrei ha kylleng ki thain khappud ka ri India bad Bangladesh kaba don kumba 444 Km, kaba ngi hap ban peitgnor bha bad ngi bthah ia ki shipai BSF bad ki pulit ka jylla” la ong u Bah Prestone Tynsong uba long ruh u MLA ka Pynursla Constituency.

Ula bynrap kaba kongsan hi ki dei ki shipai BSF ban iada ha ki khappud bad ka Bangladesh bad ka sorkar jylla ruh kan shimkhia ba ki nongshong shnong ha ki thain khappud Bangladesh ki shngain.

Halor ka jingkynnoh ki nongshong shnong ba nong Bangladesh ki wan ban leh kam sniew kam dei tang mynta, hynrei ka la jia bun sien bad ki BSF kim ju ioh kem ia kiba lehkam sniew, u Bah Prestone ula ong, “Ka DGP ryngkat bad u IG ka BSF ki la iakren halor kane ba lehse kane ka dei ka jingsdang bad ka lah ban nangjia shuh ba kham heh ha ki sngi ban wan, kumta ngi pynkhreh lypa ban iada ia ki paidbah ha khappud namar ka long ka jingma na ka jinglong jingman ha ri Bangladesh ha kine ki sngi”.

Ula bynrap ki nong Bangladesh ki ju wan barabor da ki spah ngut ban wan lute ia ki jingthung jingtep naduh mynshwa haduh ba ki trai shnong kim lah shuh ban iakhun na lade bad kine ki nong Bangla bad haba ki wan ki da peitngor bha ia ki shipai ki BSF ki don ne kim don shwa thombor ia ki briew ha khappud.

Kum ban shu pynkynmaw ha ka 17 tarik u Nohprah, 5 ngut ki nongshong shnong ka Umniuh Tmar kynthup uwei u shynrang bad 4 ngut ki kynthei, ki la shah lute ha ki nong Bangladesh ba la wan rung tuh sha ki thain ha India.

Ki 5 ngut ki la leit da ka ka kali ban leitkai pynngad ha ka jingkieng ba dang shu dep shna thymmai ha Wah Mawkylla ha shnong Nongjri bad Umniuh Tmar hynrei shiteng lynti ki la shah lute bad thombor ha ki nong Bangladesh.