Hyndai ki ju set phatok ïa ki runar ba shna ka mariang ha shnong Thieddieng

Mynshwa haba ki briew kim pat don ruh nar ban set ia ki runar, ki briew ki pyndonkam da ka jingshna ka mariang ban ai jingsneng ia kiba leh kam sniew.Kawei na kine, ka dei ka jingshna ka mariang kaba ju khot ki briew kum ka phatok hyndai ha shnong Thieddieng. Ka dei kawei na ka jaka kaba ki riew hyndai ki ju set ia kino kino ki briew kiba leh ia ki kam runar.Ia kane ka jaka kaba long thliew bad kerkut da ki mawsiang sawdong ha shiteng riat, shisien ba la hap, ym lait shuh ban mih bad na kane ka daw, ki briew ki khot kum ka phatok.Ban poi sha ka shnong Thieddieng, hap ban iaid lyngba na shnong Mawsynram ha ka jingjngai kumba 17 km eiei da ka surok.Sawdong kane ka phatok, la ker da u Mawsiang kaba don ha shiteng ka riat bad sharum jong kane, ka don ka wahbah kaba ju khot ka wah kongkhen.Katkum ka khana puriskam, ha kane ka jaka la ju thep bad bret tang ia uno uno u briew uba leh runar, bad shisien ba la shah thep ha kane ka phatok, ym ju don u briew uba lah ban lait phet na kane ka jaka.

Katkum ka jingiathuh jong uwei na ki riew tymmen ha kane ka shnong u bah Markos Wahlang ryngkat ka jingdonlang u Rangbah shnong u bah J. Sohtun, ha ka por mynshwa, haba ki briew ki leh ia ka kam runar ka ju don shwa ka jingbishar ha ka Dorbar Kongkhen bad ynda la lap ba ki leh ia kam bymman ki pynhiar da u ksai bad ki thep ia ki ha katei ka phatok ha shiteng riat.“Uno uno uba leh dakaid, ka Dorbar kongkhen ka ju shim bishar bad dain kuna bad sa thep ha ka phatok ba shiteng riat jong u Mawsiang bad wei ba la shah thep ha kane ka phatok ban hiar ruh ym lait ban kiew ruh ym lait namar kadei ka riat bah bad ha trai jong kane ka phatok ka don ka wahbah,” la iathuh uwei na ki riewtymmen jong kane ka shnong.Katkum ka jingiathuh u bah Wahlang, ha kane ka phatok la thep tang ia ki briew kiba leh ia kam runar kiba hap hapoh ka Dorbar Khathynriew shnong. Kine ki 16 shnong ki kynthup ka shnong Mawphu kaba don 4 shnong, ka Thieddieng 9 shnong bad ka Umeit kaba don 3 shnong.

Nalor kane ka phatok ha kane ka shnong ki don bun kiwei ki jaka jngohkai kum ka synduk u wein kaba hap ha Mawsohsem, ka don ruh ia ka stieh hyndai da u mawsiang kaba don ha trai Mawthoh bad ka don ruh ka krem Niangsom.Kum shi bynta ban kyntiew ia ka kam jngohkai ha kane ka jaka, na ka liang ka shnong ka la don ka jingpynkhreh ban leit iakynduh ia ki bor sorkar na ki tnad bapher bapher khnang ba kin peit lem ban kyntiew ban pynneh ia ki jingpynsah nam hyndai.