Shah jied ki samla ban mihkhmat ïa ka Meghalaya ha ka Viksit Bharat Young Leaders

25 ngut ki samla ha ryngkat 4 ngut ki heh ophisar ka Jylla kin mihkhmat ia ka Jylla Meghalaya ha ka Viksit Bharat Young Leaders Dialogue 2026 ka ban long ha Bharat Mandapam, New Delhi, naduh ka 9 haduh ka 12 tarik Kyllalyngkot 2026.
Ia ki 25 ngut la jied lyngba ki program bapher bapher kynthup ka jingkylli online (Quiz) kaba la pynlong ha u bnai Risaw-Nailur 2025.
Haba kren shaki lad pathai khubor u State Youth Officer bad Nodal Officer na bynta ka Viksit Bharat Young Leaders Dialogue 2026 u Bah Bobby Wahlang u la pynpaw ba ka jingialang jong ki samla ka dei ka bynta ba kongsan jong ka 29th National Youth Festival 2026 ha kaba ki samla kin ïa shim bynta haka Youth Leaders Dialogue, Cultural Tracks, Design for Bharat bad ka Hack for Social Change.
U Bah Bobby u la pyntip ba ki samla ka Meghalaya kin ïa shim bynta haka Youth Leaders Dialogue, Cultural Tracks and Design for Bharat.
Haka Design for Bharat track, 2 ngut ki samla pule na ka National Institute of Technology, Shillong, u Nishant Kumar Singh bad ka Neeharika Singh, ki la shah jied ha ka kyrdan National halor ka jingpynmih thymmai jong ki, kata ka Smart Braille Watch.
Ka tiar Smart Braille Watch ka iarap bad ka pynlah ia ki briew kiba duna ka bor iohi ban ioh ia ka por bad ki jingpynbna lyngba ka jingpynmih ia ki dak Braille ba lah ban ktah.
Na ka jylla Meghalaya ki samla kiba la iashim bynta haka Quiz ki long 2,393 ngut ha kaba 475 ngut ki la rung ha ka essay round bad hadien ka jingbishar bniah da ki riew shemphang jong ka tnat Ministry of Youth Affairs and Sports ka Sorkar Pdeng la jied ia 88 ngut ki samla.
U Bah Bobby u la pyntip ruh ba 23 ngut ki samla ba pawnam haka put ka tem kin kihkhmat iaka Meghalaya ha ka jingrwai tynrai bad ka shad tynrai ha ka national level, katba 3 ngut ki samla kin iashim bynta ha ka jingiakop declamation, poetry bad painting.
Ia kine ki nongiashim bynta la jied napdeng ki 1,000 ngut ki samla kiba la iashim bynta ha ka prokram jied iaki samla lyngba ka State-level Chief Minister’s Youth Engagement Programme kaba la long ha NEHU naduh 2 haduh 5 tarik Nohprah 2025.
Ka kynhun Meghalaya, kaba don kumba 50 ngut ki dkhot, kan leit sha New Delhi mynta ka sngi bad la buh por ba kan poi sha ka nongbah Delhi shwa ban sdang katei ka jingïalang.
Ha kane ka jingïalang kaba saw sngi, ki samla kin ïashim bynta ha ki jingïakren halor ki phang, bapher bapher, ki jingpyni ïa ka kolshor bad kiwei kiwei de.
Ki samla kin ioh ia ka lad ban iakynduh bad u Myntri Rangbahduhduh ka ri u Narendra Modi ha ka 12 tarik u Kyllalyngkot 2026.
Ka Viksit Bharat Young Leaders Dialogue 2026 ka ïahap bad ka jingthmu jong ka Sorkar India jong ka Viksit Bharat 2047, kaba wad ban pynkylla ïa ka ri India sha ka jaitbynriew kaba la kiew ha ka snem ba la dap shispah snem jong ka jingïoh laitluid.
Ka jingthmu ka phaikhmat sha ka jingroi kaba kynthup lang, ka jingpynneh pynsah bad ka jingsynshar kaba treikam, ha kaba ki samla ki don ka bynta ba kongsan ha kaba pynwandur ïa ka lawei jong ka ri.