Kam u Dr Batskhem ba nang ïoh jingkyrmen ka Meghalaya ban ïoh ILP ba tynruh u MP

U nongaiktien ka Voice of the People Party (VPP) u Dr Batskhem Marboh u la kam ba ka jingdawa pyntreikam Inner Line Permit (ILP) ha Meghalaya ka la nangioh jingkyrmen namar ka jingdon u MP ka VPP u Dr Ricky Andrew Syngkon ha Delhi uba la kyntu tyngeh ia ka Sorkar Pdeng.
U Dr Batskhem u la kynnoh ruh ba baroh ki party kiba don ha ka Sorkar MDA lait na ka HSPDP ki don ka jingsngew artatien ban pyntreikam ILP hapoh Meghalaya ki snem kiba la dep.
“Ki la sdang ban pdiang ia kane ka jingdawa pyntreikam ILP ha Meghalaya tang hadien u snem 2019, ynda ka Manipur ka la ioh ia ka ILP, shuwa kane, kine ki party ki ju kynnoh ba ka ILP kan pynthut ia ka roi ka par” u la kynnoh.
“Nga artatien ia ka jingmut shisha jong ka MDA, mynta namar mynshuwa ki ju ong ba ka ILP ka dei ka diengpyngkiang ia ka roi ka par” u la bynrap.
U Nongaiktien ka VPP u la pynshai ba ka Meghalaya ka dei ka jylla kaba la biang ban ioh ILP kham kloi ia ka Manipur, namar ka jingkheiñ ki rit-paid (Tribal) ka duna ia ka 50% (kumba 35% ei ei), katba ki bym dei ki riewlum ki long kiba bun paid.
“Ka jingbun jong ki riewlum hapoh Meghalaya ka long kumba 86% mamar kata ka Jylla ka donkam ILP ban iada naka jingwan buhai shnong ki bar Jylla” u la ong.
Halor ka jingkren u Symbud Myntri Rangbah, u Bah Prestone Tynsong, uba la kdew ia ka “ILP-like mechanism” (ka rukom treikam kaba syriem ia ka ILP), u Dr Batskhem u la kyntu ia ki nongpathai khubor ban leit kylli beit na u Bah Prestone halor kane.
U la kdew ba mynshuwa, ha ka por ka sorkar Congress, u Bah Prestone u ju pynsngewthuh ia ki briew ba ka ILP kam dei ka ain ka ba biang na ka bynta ka jylla Meghalaya, hynrei ha u 2018 u la iashah pat ha ka jingmynjur ia ka ILP.
U Dr Batskhem u la pynskhem ba ka VPP ka ieng skhem ha ka nongrim ba ka Jylla ka donkam ia ka ILP kaba pura bad ym ia kiwei pat ki lad ki lynti kiba tang dep.