Long jingkyrkhu ka surok 4 Lane hynrei shah ktah ki nongdie soh ha 3 Mer

Ka surok 4 Lane na Jingkieng Umshyrpi shaduh Baniun ka long ka jingkyrkhu iaka leit ka wan namar kan iarap ban tehlakam iaka jingdheng kali hynrei kane ka juh ka surok kan long ka mawjynthut iaka kamai kajih jong ki katto katne kiba die soh ha shi lynter ka surok haki thain 3 Mer.Kum ban shu kdew ba naduh ka por ba sdang ka khlam COVID-19 ha u snem 2020, ki don kumba 11 tylli ki dukan die soh kiba die ha shi lynter ka surok haki thain 3 Mer.Haduh mynta lah ban ong ba kane ka jaka die soh ka la long ka jaka kaba heh iew bha namar ka jingwan ki nongleit nongwan kynthup ki kali kamai Tourist.Lah ban kdew ba wat u Myntri Rangbah ka Jylla u Conrad K Sangma ruh u ju thied soh bha na kane ka jaka.

Hadien ba pundep iaka surok 4 Lane na Jingkieng Umshyrpi shaduh Baniun, ki kali kim iaid shuh na kane ka jaka kaba pynlong iaki nongdie soh ban pynpaw ia jingartatien hala ka kamai kajih.Ki nongdie soh ha kane ka jaka ki la iathuh ba mynshwa ki lah ban pynmih pisa da ki hajar tyngka ha ka shi sngi namar ki briew kynthup ki nongwanshang pyrthei ki sngewtynnad ban sangeh thied soh na kane ka jaka.Ki nongdie soh kiba bun ki ki longkmie kila pynpaw ba mynta ka iew ka hat ha kane ka jaka die soh kala hiar bha namar kala duna bha ka jingwan iaid ki kali na kane ka jaka.Na ki 11 tylli ki dukan kiba don mynshwa, mynta la don sa tang 6 tylli namar kiba bun ki la hap ban khang noh da ka jingbym don iew.

“Namar ba ki kali kim iaid shuh na kane ja surok barim, ka iew ka la hiar palat bad mynta ka long kaba eh wat ban pynmih tang kumba katto katne spah tyngka kaba la pynlong ia ki soh ban pyut” kila pynpaw.Ki nongdie soh ki la pynpaw ba kum ki long ki nongshong shnong, ki sngewkmen ban ioh ia ka surok thymmai.”Ngi dang ap haduh ban da pyndep pura ia kane ka surok 4 Lane ban sngewthuh bha ia ka rukom pyniaid kali, nangta ngin sa leit ban kyrpad ia ki bor pyniaid ban ai jaka noh ia ngi sha kawei ka jaka kaba bit ban die jingdie” ong ki nongdie soh.