Mad jingeh ka NEIGRIHMS bym don ka thep ia ki kam ba thylli

Ki bor pyniaid ka North Eastern Indira Gandhi Regional Institute of Health & Medical Sciences (NEIGRIHMS), ki la pynpaw ka jingeh halor ka jingduna nongtrei kiban trei, namar ka jingbym don ba thep ia ki kam ba sah thylli.U Director jong ka NEIGRIHMS u Prof. (Dr) Nalin Mehta, ula ong ba kane ka jaka ai jingsumar ka dang duna ia ka jingdon ki nongtrei ha kine ki khyndait bnai.U Dr. Mehta ula iathuh ba ki don ki kam kiba lait, hynrei ka jingeh ka long bym don kiba thep ia ki kam kiba lait hapoh kane ka shlem sumar.

“ Ki don ki kam ba sah thylli, hynrei ym don ba thep ia ki kam ba lait ha ki tnad bapher bapher. Ngi duna ia ka jingdon nongtrei, hynrei ia mynta ngi dang lah ban pyntyllun shakhmat ia ka kam,” ula ong.Ula ong ba lada ia ki kam kiba lait hapoh jaka lada ym lah ban pyndap ne thep briew, ka lah ba kan buh jingeh ia ka NEIGRIHMS, kum ka shlem ai jingsumar kaba paka sha baroh ki paidbah ka thain Lammihngi.Katkum ka jingong u Dr. Mehta ka jingthung ia ka kam Nurse ruh ka la shah ktah shibun hadien ba ka la mih ka jingpyrshah na ki katto katne ki kynhun sengbhalang ia ka rukom pynlong ia ka jingthung ia kane ka kam.

Haba iadei pat bad ki jingtei ba dang sah, ula iathuh ba haduh mynta ka jingpyntrei ia ka Critical Care Block ka la iaid sha ka 80% bad ha ki khyndiat bnai shen yn sa lah ban pyndep noh.Ula iathuh ruh ba ki la sdang ban pynbiang ia ki tiar ki tar bad ki kor ba donkam na bynta ban buh ha kane ka jaka ha Critical Care Block.“ Nga khmih lynti ba ia kane ka Block, yn lah ban pyndep pura bad pyntreikam ha ki saw ne san bnai,” ula ong.