Da ki phew snem ym don surok, bording, um dih ka shnong Umiap Langpih

Ka shnong Umyïap kaba dei kawei na ki shnong khappud bad ka jylla Assam ha ka thaiñ Langpih kaba dang hap hapoh ka Hima Nongmynsaw Syiemship kaba dei ruh kawei na ki shnong kaba la shah ieh Khunswet ha ka sorkar jylla Meghalaya mynta la da ki phew phew snem.Ïa kane la sakhi lyngba ka jingiakren bad ki nongialam shnong katei ka thaiñ ha kaba la ïoh ruh ban ïakren markhmat bad ki riewrangbah jong katei ka shnong kynthup ïa u bah Kyntiewbor Kharlyngdoh sordar ka shnong Umïap bad u bah Wondar Lyngkhoi uba la ai jingkren ha katei ka sngi bad uba la batai ruh ïa ki jingeh kaba ki paid nongshong shnong ki mad ha katei ka shnong. Shuwa ban poi sha kane ka shnong la hap ban ïaid lyngba ki surok ba bha jong ki katto katne tylli ki shnong kiba dang hap hapoh ka Assam katba mar syn kam ne ïuh kjat sha ki bynta ba la hap hapoh ka Umïap la sdang satang da ka surok kaba tang da ka khyndew bad kaba long khohruh khohram bad la hap ban ïaid ne kam lyngba ïa ki wahduid kaba pynithuh shai ba ha ki aïom lyur lei lei la hap ban ïaksait ym tang ki kali hynrei wat haba ïaid kjat ruh kumjuh.

La ong ba katei ka surok khyndew ka pynjynjar shibun ïa ka leit ka wan khamtam haba kit ïa kiba pang ba shitom ha ki aïom lyur bad ha katei ka shnong ym tang ka surok hynrei ym don wat ka bording jingshai ne umbam umdih ruh kumjuh pynban ki nongshong shnong ki hap ban pyndonkam da ki Solar na ka bynta ka jingshai. Kumban shu pyntip ba katei ka shnong ka hap hapoh ka Rambrai Jyrngam Constituency ba la long nongmihkhmat da u bah K.P.Pangngiang , Kimfa Sidney Marbaniang bad mynta pat da u bah R.G.Momin kum u MLA ba thymmai. Ha katei ka shnong ki briew ki im jakpoh lyngba ka rep ka riang kynthup ïa u Soh Ñiamtra, sohphan, kwai tympew, u synsar bad kiwei kiwei Na ka liang kitei ki nongialam shnong ki la pynpaw ruh ba naduh ba la wan shong shnong ha u snem 1970 ha ka shnong Umiap, ngi la shu im ha ka jingsahdien bad ym tang katta hynrei haba ngi leh ia kino kino ki kam kaba ngi ju trei, ngi shu shah pyndik ha ki pulit Assam man ka por, la ngi kit dieng kit siej ban thaw ïing thaw sem, ngi kit jingkit ha ki kali ki bat khlem kano kano ka daw bad ki ju shoh ju dat wat haba la pyni ia ki kot ki sla kiba la bit la biang ruh, namar kata ngi dawa ruh na ka sorkar jylla Meghalaya ba kan pynbeit noh mardor ia u pud u sam bad ban pyndep noh kham kloi.

Shuh shuh ki la pynpaw ruh ba ki kali kim ju lah ban iaid khamtam ha ki aiom lyiur namar ka jingktieh laitnoh ki kali kiba don special bad haba kit ia kiba pang kiba shitom bad kiba armet ka shem jingeh shibun, bad ka bording jingshai ia kaba ki paid nongshong shnong ki la ju angnud naduh mynshuwa kane ruh ngi kyrpad ba ka sorkar kan pynpoi noh khnang bay n lah ban ia im lem kumba imlang kiwei. Ki la pynpaw ruh ba ka sorkar kam dei ban niew shilliang la ki dei ki nongkyndong ne ki nongsor, ki MLA bad ki MDC ki dei ban shu bang tang ka ktien hynrei ki dei ban jngoh lem ban iashimkhia ia ki jingdonkam jong u paidbah jong ka thain. Ki la ban jur ruh ba ka sorkar ka la dei ban kham pynbiang ia ka PHC ha nonglang khnang ba ki briew jong ka thain kin ym donkam ban leit shaduh sha ki jaka sor bad lada ka sorkar ka pynbiang bha, kan pynkylluid ruh shibun ia ka sor Shillong, ong u bah Wondar Lyngkhoi uwei na ki riewrangbah jong ka shnong Umiap.