Bthah ia ka tnat Urban Affair ban shimkhia ba shlei um ha Lachumiere

Ka Myntri Sorkar kaba dei ruh ka MLA jong ka East Shillong constituency ka Kong Ampareen Lyngdoh hynne ka sngi ka la pynlong ia ka jingjurip ha ka thain Lachumiere, Shillong. Ha ka jingleit jurip, ka Myntri Sorkar ka la bthah ia ki ophisar ka tnat Urban Affairs ba kin peit bniah ia ka jingeh bym biang ki nala um kaba wanrah ka jingshlei um hapoh ka thaiñ Lachumiere. Ia ka Myntri Sorkar la synran da ki dkhot ka Dorbar Shnong Lachumiere bad ophisar na ki tnat treikam Sorkar. Haba kren sha ki lad pathai khubor ka Kong Ampareen ka la ong, “Nga wanrah ïa kane sha ki ophisar ka tnat Urban Affairs ba donlang ha ka jingleit jurip, ngi donkam ban leh kyrkieh ïa ka kam. Ngan sa bishar bniah biang hadien 20 sngi”. Ka Kong Ampareen ka la ong, ka jingpyndep ia ka surok All-Saints’ Road ba don shadien jong ka All-Saints School bad ka jingpyniaid ia ka nala ka long kaba donkam kyrkieh ban pyndep ban lait ka jingshlei um lada jia ba jur slap.

“Mynta ka sngi, ngi la ïoh ïa u slap nyngkong ha shuwa ban wan ka aiom slap. Ka nala shadien jong ka Sylvan House shi bynta jong ka Secretariat Hills baroh kawei kan shlei um lada jur u slap bad kan kylla long ka jingeh ba khraw ia ki longïing ha shilynter ka thaiñ. Ngi donkam ban wad ki lad lynti ban iada ia ki nongshong shnong” ka la ong. Ka Myntri ka la pyntip ka um lyngba ka nala ba don shadien ka Sylvan House ka iaid shilynter na Secretariat Hill sha ka wah Wah Pomdngiem bad ïa kane ka nala donkam ban tihjylliew bad pyniar ban lait na ka jingshlei um.“Ngi donkam ban pynthikna ba ka Urban Affairs kan shimkhia mardor ïa kane ka jingeh namar ka jingshlei um ka lah ban long kaba ma bha bad baroh ki nongshong shnong ba sah ha kane ka bynta jong ka Sylvan House kynthup ïa ka Lachumiere pdeng” ka la ong.

Nalor kane ka Myntri ka la shong bishar bniah ïa ka rukom pynïaid kali hapoh ka thaiñ Lachumiere. “Namar ka jaka ka dei ba bun tam ki ophis Sorkar ki nongshong shnong mynta ki shem jingeh bha ban leit jingleit man ka sngi na ka jingdheng kali hapoh ka thaiñ. Nga la ioh jingtip ka tnat Urban Affairs ka don ka Master Plan ba ki dang pynkhreh bad shen kin shim ban pynduna ïa ka jingdheng kali” kala ong. “Hooid, ka jingangnud ba kongsan tam ka long ban pynkynriah noh ïa baroh ki ophis Sorkar sha New Shillong Town. Nga kyrmen ba ka Sorkar kan shimkhia ïa kane ka jingeh bad nga kyrmen ba shen ngin sa ïoh ïa ki lad ki lynti ban pyllait na ka jingdheng kali” ka la bynrap.