Dawa ka FKJGP ban pyntrei mardor ia ka surok Nongstoin-Mawkawah

Ki paidbah ba iaid lyngba ka surok Nongstoin–Mawkawah, West Khasi Hills, ka la mad ia ka jingeh namar ka jingjot rathai jong ka surok na Nongstoin sha Mawkawah wat haba la dep ban khot tender da ka tnad PWD naduh u snem 2025.Halor kane ka mat, Ka Federation of Khasi Jaintia & Garo People (FKJGP) West Khasi Hills ryngkat ka FKJGP Upper New Nongstoin Unit ha ka 14 tarik mynta u bnai ki la leit ban iakynduh ïa u Executive Engineer ka PWD Nongstoin Division ban dawa ban pyntrei mardor ïa kane ka surok kaba jngai kumba 2.60 KM kynthup ïa ka jaka ieng kali.

U bah Jistarland Lyngkhoi, Asst. Secretary FKJGP West Khasi Hills, u la ong ba ia kane ka surok la khot tender naduh ka 6 tarik Jymmang 2025 ha ka mang pisa kaba T. 88.20 lak hynrei haduh mynta ym pat iohi dak ei ei ban sdang pyntrei ia kane ka surok. U la iathuh ba ha ka jingiakren bad ki nongialam jong ka seng, na ka liang u Executive Engineer u la shimkhia ïa kane ka kam bad u la telephone ruh ïa u kontraktor ba u dei ban sdang noh mardor ïa ka jingpyntrei.

“Ym dei ban iohi tang ïa ka tender tang ha ka kot hynrei dei ban pyntrei noh ia kane ka kam mardor, ong u bah Jistarland uba la maham ruh ba lada ka tnad PWD bad u Contractor ki dang pynslem, na ka liang ka seng kan sa shim da kiwei pat ki sienjam ba kham tyngeh.