Dawa ka liang pyrshah ban Register FIR ia kiba donkti khang kali namar ka ktah ia ki kali kit mar

U Nongialam ka Liang Pyrshah u Dr Mukul Sangma hynne ka sngi ula dawa ba dei ban Register ia ki ejahar pyrshah ia ki kynhun ki bym don jingiadei bad ka Sorkar ne (Non State Actors), kiba donkti ban khang bad pynthud ia ka leit ka wan jong ki kali kiba kit ia ki mar kiba kongsan, hadien ba jia ki kam thombor ha ka 19 tarik u Nailar ha ba maham ba kane ka rukom leh ka dei kaba buh ha ka jingma ia ka jylla.

Haba kren hapoh ka iingdorbar thawain u Dr Mukul ula ong, “Ngi lah sakhi ia ka jingjia ka bym shym poi pyrkhat ba la mih ha ka 19 tarik u Nailar ha kaba ki paidbah ka Jylla hi ki la mad ia ki jingeh kaba khraw”.

“Kumno ka jylla ka shah thombor bad don hapdeng ka jingma kaba khraw, ha ki kynhun bad kumno ka jingshalan ia ki mar ki mata kiba kongsan ka la shah pyndik, kane ka dei kaei kaei kaba sngewkhia bha. Ngi kwah ban tip, kiei ki sienjam ba ka sorkar ka la shim bad ia kum kitei ki jait jingjia dei ban tehlakam ha ki por ki ban wan bad kumno yn leh kat kum ka ain ia ki kynhun ba donkti khnang ba ka jylla kan ym shah thombor ha kano kano ka por” la ong u Dr Mukul.

Hadien ba u Myntri Rangbah ka Jylla u Conrad K Sangma ula wanrah ia ka ‘Suo Motu Statement’ halor katei ka jingjia, u Nongialam ka Liang Pyrshah ula dawa ba dei ban leh da kaba tyngeh ia kiba pynthut ia ka jingiaid ki kali kit mar katkum ki kyndon jong ka aiñ.

“Kiei kiei ki sienjam kiba la shim da ka Sorkar Jylla kadei kaba hap ban ai jingiaroh hynrei ka jingshisha ka long ba um don uno uno ruh uba don ia ka hok ban thombor bad buh hapdeng ka jingma ia ka jylla bad ban pynthud ia ka jingpynpoi ia ki mar kiba kongsan. Hato ka Sorkar ka lah ujor da ka ejahar pyrshah ia kito ki kynhun kiba khang ia ka surok?” ula buh jingkylli.

“Ngi dei ban don ia ka bor ban sngewthuh lypa pyrshah ia kitei ki jingjia kiba pynlehrain ia ka jylla, namar ba kine ki long kiba ma bha ia ka jylla. Nga kyrpad ba dei ban shimkhi ban ithuh ia kine. Nga dawa ba dei ban ujor da ka ejahar pyrshah ia kito ki kynhun kiba la thombor bad buh hapdeng ka jingeh ia ka jylla, khamtam eh ha kaban pynthud ia ka kit ka bah ia ki mar kiba kongsan. Lem kumta, lada ngim leh eiei, ngin sa iohi biang ia kum kine ki tamasa na ka por sha ka por” ula ong.