Donkam mang pisa ban shna surok, jingkieng bad jaka sumar

Ka jingshim khia u Myntri Rangbah ka jylla u Conrad K Sangma ban pyniajan bad ki paidbah lyngba ka CM Connect, la pynlong ia ka Block Level Interactive Programme na bynta ki shnong ba hap ha Nongstoin Block, West Khasi Hills District. Ka CM Connect ba la pynlong ha Nongstoin ka dei kaba 5 ba la pynlong ha jylla bad u Myntri Rangbah ula ong ba un bteng ban ialeh ban pyniajan ia ka jingai jingshakri ka sorkar sha ki paidbah ka jylla. Ki nongialam shnong ba mihkhmat ia ki shnong ha ka Nongstoin Block ki la ioh ka lad ban iakren bad u Myntri Rangbah ban pynpaw ia ki mat bad ki jingdonkam ka shnong bad kyrpad ia u Myntri Rangbah ba un tuklar lem. Ki mat kiba la pynsgew da ki nongialam shnong ki kynthup ia ka jingbhah tyngka ban shna ia ki surok, jingkieng, Health Center, ki kam pynroi na ka bynta ka kam jngohkai, ki kam pynroi ha ka liang ka kam ialehkai, ka jingdonkam ia ki Bank bad ban kyntiew ia ki prokram bad ki skhim, ban kyntiew ia ki skul bad ki jaka ai jingsumar ia ki mrad bad kiwei kiwei. U Myntri Rangbah ula shah shkor bha ia ki jingpynsngew ki nongialam shnong bad ula bthah ruh ia ki khlieh ki tnad sorkar ban shimkhia mardor halor kitei ki mat.

Ha kaba ia dei bad ka jingsngewkhia halor ka koit ka khiah, u Myntri Rangbah ula ong ba ka sorkar ka dang ialeh ban kyntiew kyrdan ia ki jaka ai jingsumar ba la don lypa khnang ba kin lah ban ai jingshakri kham bha. Ula bynrap ka sorkar kan pynbiang ia ki Grant na ka bynta ki sengtrei mon sngewbha ban kyntiew shuh shuh ia ki jingtei bad jingdonkam ba la don lypa ha ki jaka ai jingsumar. Ula pynbna ka sorkar kan ialeh katba lah ban kyntiew noh ia ka Nongstoin Civil Hospital. Ha kaba iadei bad ka kam ialehkai, u Myntri Rangbah ula pyntip ba ka sorkar ka la bei tyngka palat T.1000 Klur na ka bynta ban kyntiew ia ka jingtei ha ki kam ialehkai ha kylleng ka jylla Meghalaya bad ula pynthikna ba ka sorkar kan trei ryngkat lang bad ki shnong ki thaw ban tei ia ki jaka ialehkai ha ki thaiñ nongkyndong.

Ha kaba ia dei bad ka jingkyrpad ban pynduna ia ka ram na ka bynta ki SHG, u Myntri Rangbah ula ai ka jingkular ba un shimkhia ia katei ka kam bad ka Myntri ka Sorkar pdeng kaba khmih ia ka pla tyngka. Haba kren ha ka jingialang, u Myntri Rangbah ula ong ba ka CM Connect ka dei ka kabu ia ka sorkar ban sngap bad shah shkor bad ban pynbeit ia ki jingeh jong ki paidbah bad ula pynshlur ia ki MLA, ki khlieh jong ki tnad Sorkar ban pyniasoh bad ki paidbah ha ka kyrdan ka jong ki.