Halor ka jingkhlad u khnnah 12 snem ba suba dih ‘STING’

U Myntri ka tnad ka koit ka khiah u bah Wailadmiki Shylla hynne ka sngi ula iathuh ba ka jingkhlad u khynnah 12 snem kam dei satia na ka jingdih u Sting Energy Drink hynrei katkum ka kaiphod ka jingkhlad jong u ka dei na ka jingmynsaw u khyllai.

Ia kane u Myntri ula iathuh haba jubab ia ka jingkylli ba la wanrah da u MLA u Rupa Marak ha Iing Dorbar Synrai hynne ka sngi.

U Myntri ula ong ba hadien ka jingkhlad u Khynnah ka sorkar ka la leh ia ka jingtohkit bad katkum ka kaiphod na ki doctor ka Civil Hospital, Tura, la kdew ba ka jingkhlad une u khynnah kam ia dei na une u jingdih.

Ha kajuh ka por, ula ong ba ka tnad ka koit ka khiah lyngba ki food safety officer kila pyllong man ka por ia ka jingjurip ia ki dukan die jingbam ban thikna ba kin long kiba bit ban bam ki briew.

Na ka liang u nongialam ka liang pyrshah, u Dr. Mukul Sangma ula kyntu ia ka sorkar kam dei ban shu pynkut tang ha ka kaiphod ki doctor hynrei ka dei ban shim ia ki sienjam ban iada na ka jingma jong ki paidbah namar ba don ki jingbam ba die kiba la kut por.

Halor kane, u Myntri ula pyntip ruh ba la pyllong ia ka jingjurip man u bnai ym duna 10 tylli ki dukan heh.

U la ong ba shwa kane ka jingjia, la dep phah test ia une u jingdih Sting bad ka pyni ba kam don eiei ka jingktah.

Ula pyntip ba ladep pyllong jingjurip 3756 sien bad la test 2844 bad 5541 tylli tam ki sample na ki jait jingbam ha kine ki 3 snem na kylleng ki District ha ka jylla.