Iaid beit ka ‘Public Hearing’ ka Shree Cement, siat ‘Tear Gas’ ki pulit ia ki paidbah, julor ki kali kynthup ka Ambulance ba shah kawang maw

Ka Public Hearing jong ka Shree Cement Limited ba la pynlong ha Lum Syrman ha Elaka Nongkhlieh, East Jaiñtia Hills District halor ka jingthmu ban tih mawshun ha Lum Syrman ba la pyniaid da ka Meghalaya State Polution Control Board (MSPCB) ka la iaid beit khlem don ba pyrshah hynne ka sngi.

Ia ka public hearing la pyniaid da u A. Nongbri, MCS, Additional magistrate, East Jaiñtia Hills District bad haba sdang ia ka public hearing u Yoofranky H Laloo Environment Engineer MSPCB ula pynshai ia ka jingmut ka Public Hearing bad ula ong, “kane dei ka sien ba ar ban pynlong public hearing ha kane ka jaka hadien ba la pynpep ha ka 22 tarik u bnai Jymmang, 2026 na ka daw ba mih ka jingkulmar ha ka public hearing.

U la ong lyngba kane ka public hearing wat lada don kiba kyrshan ne pyrshah ruh na ka liang ka MSPCB kam lah ban ai ia ka rai, hynrei kiei kiei ba jia ha kane ka hearing kin sa phah sha ka State Environment Impact Assessment Authority.

Hadien ba ka Shree Cement ka la pynsngew ia ka rukom ban pyntreikam ia ka jingtih mawshun kumno kan ktah kumjuh ki lad jingiada ia ka mariang, la ioh ka jingkren ki paidbah ba ai jingkyrshan kynthup ia u Wilson Sukhleiñ na ka shnong Tongseng, u Nangiaid Pyrshang waheh shnong Bamkhosngi, u Pynpoibiang Dkhar waheh shnong Tongseng, u Fencing Bareh Secretary Elaka Nongkhlieh, u Dolloi Elaka Nongkhlieh u Na o Kyrmen Sukhlaiñ.

Kine ba ai jingkyrshan ki ong, ka daw ba ki kyrshan dei namar ba ki khmih lynti ban poi ki kam pynroi hapoh ka Elaka ban ioh kam ioh jam ki khun ka Elaka bad kyrmen kin ai jingiada ia ka mariang.

Ki bynrap ruh namar ki iohi ba lada shaniah tang ha ka rep ka riang ka thaiñ kam lah ban nangkiew.

Ki ong ruh ba kane kam dei ka jingleh donbor hynrei dei da ka jingiamynjur lang bad ka sur u paidbah ka Elaka ki la rai ban kyrshan tylli ia ka Shree Cement.

Halor kane ka public hearing ba la long mynta ka sngi, ka la mih ruh ka jingkulmar naduh hynnin ka janmiet 30 tarik ha lad Shnongrim bad ha iew Cement shwa ban poi sha Elaka Nongkhlieh.

Nyngkong la don ka jingpakhang lynti ha lad Shnongrim ia ki briew sorkar lem ki bor pulit ba thmu leit sah lypa sha katei ka jaka ban pynlong public hearing ha ki briew ba pyrshah ba dei ki nongrep ka Shnongrim, kiba la pynpaw ruh ia ka daw ba ki pyrshah dei namar haduh mynta kam pat don ka jingpynbeit halor ka jingshah ktah ki jaka rep jong ki.

Hynrei kham hadien ki pulit ki la tur beit bad ioh ban leit sha ka jaka pynlong public hearing.

Hadien kane la mih ka jingkulmar ha iew cement na ka jingwan tur ki paidbah ba pyrshah ia ka public hearing, ha katei ka jaka la wan poi ruh ki sengbhalang bad ha ka jingsiat ‘tear gas’ ki pulit ban pynpra ia ki paidbah kawei ka longkmie ka la lyniar na ka jingsat ki tear gas.

Ka khubor ba ioh ka iathuh ha ka por shiteng miet 30 tarik ka kali Ambulance jong ka seng JSU ka la shah pynjulor katba ka dang thmu leit shaw ia kiba mynsaw na ka jingshah siat tear gas.

La iathuh ha ka step 31 tarik ba dei ka sngi ban pynlong public hearing ha ka por 8 baje, dang step ki paidbah ki lap ba la pyndkut bad tih ia ka surok shwa ban poi shongrim kaba dei shi bynta ka jingiakhih hapdeng kiba pyrshah bad kiba kyrshan. Ha kane ka jaka la don ruh ka jingkawang maw nalor lum sha ki briew bad kali ba don hapoh surok bad bun ki kali ki la julor.

Ha kane jingjia kawei ka longkmie ar met na Shnongrim ba mut leit kha khyllung sha jaka sumar ka hap ban shim kali da kawei pat kaba wan na shiliang namar ba la tih ia u surok.

Kane ka jingtih ia ka surok ka la pynlong ia ki briew ba mut leit sha ka public ban sahkut shiteng lynti bad kim lah shuh ban poi sha katei ka jaka.

Kumjuh na ka liang ki nongrep ka Shnongrim ki la mih ha ryngkat ki placard ban leit pynpaw ka jingpyrshah ia ka public hearing ka Shree Cement Ltd ki ong ba ki la shah khang lynti noh ha ki pulit.

La iathuh hynne shiteng sngi hadien ba la kut ka public hearing ia katei ka surok ba tih la pyndap khyndew biang khnang ba ki kali kin ioh ban leit ban wan.

Ki paidbah ba thmu ban leit sha ka public hearing ban pyrshah ki pynpaw ka jingbynñiaw bad pynrem jur halor ka jingbym ioh lad ban shim bynta na ka daw ka jingshah khang shiteng lynti bad kim lah shuh ban poi sha sha kane ka jaka, ki kynhun sengbhalang kynthup ia ka seng JSU, KSU, JNC ka Meghalaya indeginous.