Iaid lait ka sorkar ia ki kyndon ka IPH ban thungkam Pharmacist

Ki samla ba la pyndep ia ka Pharmacist ki la pynpaw ka jingsngew diaw halor ka jingslem ka tnat ka Koit ka Khiah ka Sorkar Jylla ban pynmih ia ka Advertisement ban thungkam ha ki jaka ai jingsumar bapher bapher kiba don hapoh ka Jylla. Haba kren shaki lad pathai khubor u samla Emos June Syiemlieh ula kynnoh ba ki don bun tylli ki CHC, PHC bad ki Hospital ki bym don ia ki Pharmacist hynrei haduh kine ki sngi ka Sorkar ka la shu thungkam Pharmacist da ki Contractual. U samla Emosjoh u la ïathuh ba kum ka kynhun ki la dep pynsngew ruh ha ka Myntri ka Sorkar Jylla kaba khmih ia ka tnat ka Koit ka Khiah ban kham pynbun ïa ka lad thungkam na ka bynta ki samla kiba la pyndep ïa ka jingpule Pharmacist da kaba seng ïa ki Pharmaceutical Industries hapoh ka Jylla bad ban thung ruh ïa ki Pharmacist ha ki District Hospital, ki CHC, ki PHC, bad ki Sub Centre katkum ki kyndon jong ka Indian Public Health Standards (IPH).

U la kynnoh ka tnat ka koit ka khiah lane ki jaka sumar jong ka Sorkar ki iaid lait ia ki kyndon jong ka IPH halor ka jingthungkam ia ki Pharmacist ha Jylla. “Ka long kaba sngewsih namar ba ka tnat ka Koit ka Khiah jong ka Sorkar Jylla ka shu pynthame ïa ki samla tang da ki kam Contractual katba ïa ki Permanent Post ka Sorkar ka pynmih duna bha” la ong u samla Emos.

U samla Emos u pynpaw ruh ka jingsngewdiaw halor ka jingbym shimkhia ka Myntri ka tnat ka koit ka khiah ban khot ïakren iaki, watla kala kular ban khot ïakren sani halor ki mat jingdawa ki samla bala pyndep pule Pharmacist. “Nai pynbor ïa ngi ban shim ban shim da kiwei ki sienjam, la ka long ba ngin leit sha Iingkashari ne ngin pynbun iaki jingiakhih. Daka burom ngi kyntu iaka Myntri ban pyndep ïa kaei kaba phi la kular” u la ong.