Leit u Deputy Speaker ha iing Kashari ban ai sakhi pyrshah ia 2 ngut ba pynjah burom

U Deputy Speaker ka Iingdorbar Thaw Ain ka Jylla u Timothy D Shira hynne ka sngi ula leit mih ha Iingkashari u Chief Judicial Magistrate, Shillong ban ai ki sakhi (Statement) ban bishar ia ka mukotduma ba u mudui pyrshah ia 2 ngut ki nongleh YouTube. Ha kane ka mukotduma, u Deputy Speaker ula dawa ka bai mynrain khmat mar T.100 klur na 2 ngut ki nongleh khubor YouTube, namar ka jingpynsaphriang khubor bakla halor ka jingkren jong u ha Iingdorbar Thaw Ain halor ka jingpynlong ia ka Tura kum ka Winter Capital ka Jylla. Haba kren sha ki lad pathai khubor, u Nongiasaid Ain Sujit Dey ula ong, “Mynta ka sngi, u Deputy Speaker ula ai ki sakhi hapoh ka kyndon 323 jong ka BNSS bad ia ki jingkren jong u la buh jingthoh bad ka Iingkashari kan sa shong bishar”. “Ka dei ka mukotduma kam bymman (criminal proceeding), ia ki sakhi ba la ai yn sa bishar bad ka Iingkashari kan sa pynmih ia ka hukum lada ka sngewhun ba ka don ka jingpynjah burom ia u briew jong nga” ula bynrap.

U Sujit Dey u la ong “Ki don artylli ki mukotduma ba la mudui, kata kawei ka kam bymman bad kawei ka civil. Mynta ka sngi, ngi la iakren ia ka mukotduma kam bymman”. Ha shwa kane, ka dei ka mukotduma civil ha kaba ngi la kam bailutksan namar ka jingpynjah burom ia u briew (Dy Speaker). Ha kane ka civil defamation, ngi la dawa mar T.100 klur na kine ki nongshah mudui”. Haba kylli la ka don lad ban pynbeit ne iakren sngewthuh jingmut ia kane ka kam shabar ka Iingkashari, u Deputy Speaker ula ong ba kan nym don shuh ka jingiakren pynbeit ne sngewthuh jingmut namar kine ki 2 ngut kiba pynmih ha ki social media kim shym la pyni ia ka jingleh bakla jong ki.“Kim don satia ia ka jingbabe ne ka jingsngew ba ki leh bakla. Kumno ngin iakren pynbeit. Kan nym don satia ka jingiakren pynbeit. Ka la pynthoh bria ia ka jinglong jong nga bad nga hap ban pyrkhar arsien-laisien ban wan sha ka jingiakren sngewthuh jingmut” u la kren shai.

U Sujt Dey ula ong, “Ym tang ba ki la pynjah burom ia u briew (Dy Speaker) jong nga hynrei ka la pynthoh bria wat ia ka iing ka sem jong u baroh kawei”. “Mano mano ruh ki don ka hok ban pynpaw ia ka jingsngew ha ki rynsan social media hynrei kam dei pat ban pynmong ne pynjah burom iano iano. Ki lah ban ong kumno kumno ruh hynrei ym dei ban pynjah burom” u la ong.