Ioh khusnam ‘Lifetime Achievement Award’ u Dr RS Thangkhiew halor ki kam ai jingsumar

Ka Supercare Hospital ka sngew sarong ban pynbna ba u Founder bad Managing Director jong ka, u Dr. RS. Thangkhiew ula ïoh pdiang ïa ka khusnam kaba don burom ba la tip kum ka Lifetime Achievement Award na ka North-East Liver Foundation Society ha ka 6th North-East Medicon 2026, kaba la long ha ka 6 tarik u Jylliew 2026 ha Guwahati, Assam.Ïa kane ka khusnam la ai kum ki jingnoh synñiang ba kyrpang bad kiba neh slem jong u ha ka bynta ka jingai jingsumar ia ki paidbah, ka jingai ti jong u ha ka jingsumar ïa ki nongpang bad ka jingshakri paidbah kaba la neh da ki phew snem. Kane ka burom ka ithuh ïa ki jingtrei shitom jong u ban pynkhlaiñ ïa ka rukom ai jingsumar paidbah bad ban pynsuk ïa ka jingïoh ki jingshakri sumar ba bha ha kylleng ka Meghalaya bad ka thaiñ Northeast hi baroh kawei.Ha ka jingïalam ba shemphang jong u Dr. Thangkhiew, ka Supercare Hospital ka la kylla long kawei na ki jaka sumar ba pawnam ha ka thaiñ, da kaba ai ïa ki jingsumar ba la tbit bad kiba thymmai bad ka dang bat skhem ïa ka nongrim ka jingsumar ba don jingïadei bad jingïasyllok bad ki nongpang. Ka jingthrang jong u ban poi sha ka jingbha ka la noh synñiang shibun ban kyntiew ïa ka kyrdan ka jingsumar paidbah bad ban pynroi ïa ka jingstad ha ka thaiñ.

Haba kren halor kane ka jingjop, u Bah Damien Marwein, Chief Operating Officer jong ka Supercare Hospital u la ong: “Kane ka jingithuh ka long jingsngew sarong ym tang ïa ka Supercare Hospital hynrei ïa ki kynhun jong ki nongtrei ban ai jingsumar ha Meghalaya. Ka jingaiti lut jong u Dr. Thangkhiew ha ka jingsumar ïa ki nongpang, ka rukom sumar hok bad ka jingpynroi ïa ki jingshakri sumar ka la ktah bha ïa bun bah ki jingim ha ka thaiñ. Ka jingïohi jngai bad ka jingïalam jong u ka dang bteng banpynshlur ïa ki nongtrei sumar bad ban pynïaid shakhmat ïa ka thong ban ai ïa ka jingsumar kaba bha bad ba dap da ka jingsngewsynei. Ngi sngewkmen shibun ban ïohi ïa ka jingtrei shitom jong u ba la ithuh ha kane ka rynsan kaba don burom.”Ka management bad ki nongtrei ka Supercare Hospital ki ai ka jingïaroh ba khraw ïa u Dr. RS Thangkhiew halor kane ka burom ba u dei hok ban ïoh bad ki pynskhem biang ïa ka jingangnud jong ki ban bteng ïa ka jingïohi jngai jong u ban wanrah ïa ka jingsumar ba suk ban poi, kaba hok bad kaba don kyrdan na bynta ki paidbah ka Meghalaya bad shabar ruh. Kum ban pynpaw ia u Dr Thangkhiew la kha ha ka 28 tarik u Nailar 1957 ha Shillong, u dei u wei na ki nonglamkhmat ha ki lad jingai sumar paidbah ha Meghalaya bad ka thaiñ Shatei Lammihngi. U dei u alumnus jong ka PGIMER, Chandigarh bad ula wanphai sha Shillong ha ki snem 1980 kum u Doctorate in Medicine (DM) uba nyngkong na ka jaitbynriew Khasi bad u DM Gastroenterology (Ka jingpyntbit ha ka jingsumar ïa ka kpoh) uba nyngkong ha ka thaiñ Shatei Lammihngi.

Haba iohi ïa ka jingdonkam ban don ki jingsumar ba la kiew ha ka jylla, u Dr.Thangkhiew ula wanrah shibun ki lad bad ki jingthaw thymmai ha ka jingai sumar. Ha u snem 1988, u la seng ïa ka jingshakri endoscopy banyngkong ha ka jylla, hadien kata ha u snem 1995 u la wanrah ïa ka video endoscopy bad video colonoscopy kiba la tbit. Ha u snem 1999, ula leh ïa ka rukom sumar ERCP (Endoscopic Retrograde Cholangio pancreatography) kaba nyngkong ha ka thaiñ shatei lam mihngi kaba la long kawei na ki mawjam ba kongsan ha ka histori ka jingsumar ha kane ka thaiñ.

Da ka jingïohi jngai ban pynbha ïa ki lad jingsumar kaba bha, u la seng ïa ka Supercare

Medical Centre ha Shillong ha u snem 1991. Kane ka jingïohi jngai ka la poi sha ka jingthaw ïa ka Supercare Hospital ha u snem 2005, kaba mynta ka la kylla long kawei na ki jaka sumar ba paw khmat ha Meghalaya. Kum ka jingïaroh ïa ki jingnoh synniang jong u ha ka gastroenterology, la thung ïa u kum u President banyngkong ka Indian Society of Gastroenterology-North-East Chapter ha u snem 2018. Ha ka jingïaid lynti ba la palat sawphew snem, u Dr. Thangkhiew u la ïoh ka jingshaniah bad ka burom na ki pateng ki nongpang bad ula bynta ban shna ïa ka dur ka dar jong ka jingsumar paidbah ha Meghalaya bad ka thaiñ Shatei Lammihngi.