Ka Rope Way kam wanrah jingma ne pom dieng pathar ha Lum Shyllong: Paul

U Myntri sorkar barim ba khmih ia ka tnat Tourism uba dei ruh u MLA ka Shillong West constituency u Bah Paul Lyngdoh ula ong ba ka jingkylli kam mih, ba ka Shillong Ropeway Project kan lam sha ka jingpom dieng pathar ne kan buh jingma ia ki khlaw ki btap ba don hajan u Lum Shyllong (Shillong Peak).

Haba kren sha ki lad pathai khubor u Bah Paul ula buh jingkylli ia kiba pyrshah ia ka Shillong Rope Way Project da kaba ong “Phi mut ba kat ka President jong ka ri India kan wan buh maw nongrim ia ka Project khlem da wad bniah shwa, hato kane ka Project ka la ioh lut ne em ki jingmynjur na ki tnat bapher bapher”.

U Bah Paul ula ong ba ka jingpom dieng ka dei thik tang ha ki jaka ba tei ia ki Tower bad ka jaka sdang (Base) jong ka Project. “Lait na kine ki jaka ba dei ban pom dieng kam don nongrim ban ong ba kane ka Shillong Rope Project kan wanrah ia ka jingpom dieng pathar ne kan buh jingma ia ki khlaw ki btap ha Lum Shyllong” ula ong.

U Bah Paul ula ong ba kiwei ki Jylla ri lum (Hills Station) kum ka Uttarakhand ka la don lypa kum kane ka Rope Way Project.

Ula ong ba ia ka Shillong Rope Way Project la pynwan dur katkum ki Rope Way kiba don ha ki lum (Alps) hapoh ka ri Switzerland.

“Ka Shillong Rope Way Project kadei thik kum ki Rope Way ba la shna ha ki lum (Alps) Switzerland. Kumta da kata ka buit nga kyrmen ba nga sngew skhem ba ka tnat Tourism kan shim khia ban pynthikna ba kane ka Project kan iaid beit iaid ryntih” ula ong.