“Ka VPP ka ïeng ha ka nongrim ban wanrahïa ka synshar ka bym noh shiliang”

U MLA ka Mawlai u bah Brighstarwell Marbaniang ha ka sngi Saitjain 18 tarik Kyllalyngkot ula khot bad wer ia ki paidbah ka thain Umsong ban iaineh bad kyrshan ia ka seng Voice of the People Party na bynta ban wanrah ka jingkylla ha ka synshar bad ka imlang sahlang ha ki District Council bad ka jylla baroh kawei. Haba kren ha ka jingialang paidbah ha Iew Umsong u bah Brighstarwell ula kyntu ia ki paidah ba kim dei ban ngop ha kiwei ki kynhun kiba wan ban khroh bad pynbiej, hynrei kin ieng shkem ha ka nongrim ban wanrah jingkylla da kaba kyrshan ia u kyrtong ka VPP u bah Apkyrmen Lyngdoh Nonglait kumba ki la kyrshan  ia u kyrtong MP ka VPP haduh ba ula jop kput ha ka ilekshon MP.

Ula ai nuksa ia kaei ba u president ka Unkraine u Volodymyr Zelenskyy  ula leh hadien b aula shimti ia kam President ula ong, “ia ki ophisar ba kim dei ban buh ia ka dur jong u ha ki ophis treikam jong ki, bad ha jaka ban buh ia ka dur jing u kan bha shibun ban buh ia ki dur ki khun jong ki ban kynmaw ia kaei ka kam ba ki dei ban leh na bynta ka lawei ki khun jong ki”.Kumjuh la kyntu ia ki paidbah ba ha ka miet 20 tarik Rymphang, ynda ki khun bad ki ksiew jong phi ki la ioh thiah leit peit ia ki bad puson kaei ka lawei jong phi, kane ka pynshai ki jingmut jingpyrkhat jong na bynta ka lawei ki khun ym ban shah pynbiej tang ha ka por ilekshon.

Ha kane ka jingialang ula pynshai ruh ia ki nongrim treikam ka seng kaba don ka jingangnud ba ba shkem ban wanrah ia ka jingkylla ha ka synshar bad ka imlang sahlang na bynta ka jingmyntoi ki duk ki suk bad ki skhim kin ym jah rngai hynrei kin poi sha ki paidbah kumba la mang da ka sorkar.