Kat bym pat pynbeit ki kynrum kynram dawa pynsangeh ka JSU ia ka eksam DSC

Ka seng Jaiñtia Students Union, Central Body hapoh ka jingialam u President Jersome Shylla, u General Secretary Nielkee Mukhim lem bad kiwei ki dkhot mynta ka sngi ki la leit iakynduh ia u DC ka West Jaiñtia Hills District u Abhinav Kumar Singh, uba dei ruh u Chairman ka DSC ban dawa pynsangeh shwa shipor ia ka exam DSC ka ban long ha ka 29 tarik mynta u bnai.

Ka daw ba ki dawa ban pynsangeh shwa dei namar ba iaka result Grade VI bala pynbna paidbah naduh u 2021 bad bala dep pynleh ruh ia ka interview ha u bnai June 2026 ym pat pynmih result haduh mynta.

Sa kawei ka daw ki ong namar ba ki iohi ba ka post LDA ka dang don mynta hapoh ka case ha Meghalaya High Court naba don ka jingsuba lehtuh hapoh kane ka DSC, na kata ka daw ka seng ka dawa ba kat bym pat lah pynbeit iaka rukom thung kam thung jam hapoh West Jaiñtia Hills dei ban pynsangeh shwa ia kane ka exam.

U President JSU central Body Jersome Shylla u ong, kane ka jingwan dawa jongki na u DC West Jaiñtia Hills dei hadien ba bun ki candidates kumjuh ki paidbah ka Rilum Jaiñtia kila pynsngew ia kane ka mat sha ka seng, bad khnang ban ioh ka jingshaniah na u paidbah u ong donkam ban pynsangeh shwa ia kane ka exam ban sa long.

Ha ka juh ka por u ong ka seng ka khlem pyrshah iaka thungkam thungjam, hynrei ka pyrshah iaka system ne ka rukom leh haba iadei bad ka jingkhot thung kam thung jam.

Haba pynsngew ka jingisynei iaki samla bala trei shitom naka bynta ban iakhun iaki exam bapher bapher, ula pynkynmaw ruh bala don kawei ka case hapoh high court bala mih kyrteng ban leit personal interview da ki candidates bym shem la thoh ne pyndap ei ei ruh em hapoh ki OMR sheet.

Bad dei kane kaba pynlong iaka JSU ban artatien ia kane ka DSC.

Kumta u kyrmen bad shaniah ha ka jingbishar ka highcourt ba kiei kiei baroh kin long kiba beit ba ryntih naka bynta ka jingmyntoi ki candidates bad u paidbah.

Ha kajuh ka por ki khmih lynti ruh ba ki paidbah kin ai jingkyrshan ia kane ka mat ba ka JSU kala sdang ban iaid lynti.