Khang tala ka FKJGP 30 tylli ki dukan bar jylla bym don Trading License ha Balat

Ka Federation of Khasi-Jaintia & Garo People (FKJGP) South East Khasi Border Circle mynta ka sngi ka la khang khyrdep ia palat 30 tylli ki dukan bar jylla kiba la treikam be-ain khlem da ioh laisen khaii napoh ka Khasi Hills Autonomous District Council (KHADC) ha Iew Sonatola, Nongkriah bad Balat, kiba hap hapoh Mawsynram Block jong ka East Khasi Hills District. U President ka FKJGP South East Khasi Border Circle, u Bah Kyrmen Shangdiar u la pyntip ba ka seng ka la khang khyrdep ia kine ki dukan hadien ba ka la pynlong ia ka jingkhynra kynsan ia ki lisen khaii jong ki dukan bar jylla ha ki iew bapher-bapher ha ka thain India-Bangla kiba hap hapoh Mawsynram Block ha kaba la lap ba shibun kitei ki dukan bar jylla kim don lisen khaii satia bad don ruh napdeng jong ki, kiba don tang ia ki laisen khaii ba la kut por ba la ai da ka District Council.

U Bah Kyrmen u la ong ruh ba ka jingbym lah jong ki bor ba dei peit ban tehlakam ia ka jingkhaii be-ain jong ki bar jylla ka la buh ia ki trai ri trai muluk ha ki thain nongkyndong ha ka jingeh kaba khraw namar ba ki briew kiba na shabar ki la shim noh wat ia ka khaii pateng kaba rit ba ki trai ri ki lah ban leh. “Ka long kaba sngewsih haduh katta katta ba kumno ki briew nabar ka jylla ki lah ban rung da kaba suk sha ki iew ki hat jong ngi ha ki jaka nongkyndong da kaba knieh noh ia ka kam jong ki trai shnong bad pynkylla ia ki tang kum ki nongthied nongpet”, la ong u bah Kyrmen. Kumta na ka liang ka FKJGP ka kyntu ïa ki Sordar, ki Hima bad ka KHADC ba kim dei satia ban dang ai lisen khaii thymmai sha baroh ki bar jylla ha katei ka thaiñ khnang ba kan wanrah ïa ka lad kamai kajih ïa ki trai ri trai muluk namar kine baroh ki dei ki kam khaii barit kiba ki trai ri trai muluk ki lah ban leh.

Ka FKJGP ka la pynpaw ruh ka jingsngewkhia halor ka jingiohlad ban rung laitluid da ki katto katne ki bar jylla na Andra Pradesh and Bihar sha nongkyndong da kaba ki leit tywa tiar na kawei ka shnong sha kawei pat, bad ka seng ka la shim ba kane ka long kaba ma haduh katta katta namar ym don ba tip la kitei ki briew kidei kiba bha ne kiba sniew ne lehse ki don da kiwei pat ki jingthmu ba sniew.