Ki kynthei ha Jylla ki nongiada ia ka khyndew bad noh synniang ia ka rep ka riang

Ka Department of Agriculture and Farmers’ Welfare jong ka Sorkar Meghalaya ryngkat ka jingiatreilang bad ka IFOAM -Organics Asia, hynne ka sngi ka la pynlong ia ka International Conference on Women Farmers and Sustainable Organic Agriculture ha State Convention Hall, ha kaba ki nongialam, ki nongthaw polisi treikam, nongwad bniah bad ki nongrep na kylleng ki ri ki la wan ban iahsim bynta ha ka jingialang.Ia kane ka jingialang la pynlong kum shibynta ban rakhe ia ka United Nations Year of the Woman Farmer 2026 bad ban buh ia ka Meghalaya ha ka kyrdan kaba long pdeng jong ka jingiatai ha ka pyrthei ha ka kam rep kaba lamkhmat da ki kynthei, ka jingshngain ha ka jingpynmih ia ki marbam bad ka rep ka riang kaba iai neh.Kane ka jingialang kan pynmih ruh ia ka ‘Joint Declaration’ ban ioh ia ka jingithuh kaba iar, jingkyrshan, jingbei tyngka ia ki nongrep kynthei kum ki nohsynniang kiba kongsan sha ka jingshngain ha ka jingpynmih ia ki marbam, ka jinglah ban shan na ka jingkylla ka suinbneng bad ka roi ka par kaba iaineh.

Haba ai jingkren, u Myntri Rangbah ka Jylla u Conrad K. Sangma ula pynpaw ba ka Meghalaya ka don ia ka jinglong kaba kyrpang ha kaba ia dei bad ki kynthei, ha kaba ki don ia ka bynta kaba khraw kum ki nongiada ia ka khyndew bad ia ka rep ka riang bad ka Meghalaya ka lah ban ai ia ka ka nuksa kaba kongsan ia kiba thaw ia ki polisi treikam ha kaba iadei bad ka kam rep kam riang ha ka pyrthei baroh kawei. U la ong, ba ka jylla ka la pynlut ha kine ki 8 snem ha kaban tei ia ka jinglong jingman kaba ia dei bad ki nongrep bad ka kam rep kam riang, da kaba banjur ha kaban pynkup bor ia ki kynthei, ban pynkhlain ia ki Self-Help Group bad ki kynhun jong ki nongrep bad ban kyntiew ia ki jaka treikam jong ki shnong ki thaw bad ula banjur ia ka jingkongsan ban pynneh pynsah ia ka jingstad tynrai namar kadei kaba iahap bha bad ka rukom leh ha ka rep ka riang tynrai bad ka jingpyndonkam ia ki kor teknoloji kane ka juk ba mynta ban kyntiew ia ka jingpynmih ha ryngkat bad ka jingiada ia ka jingriewspah kaba la don naduh hyndai ha ka thaiñ.

Ki nongpyniaid ki la pynpaw ba ki kynthei bad longkmie ki don ia ka bynta kaba khraw ha kaba iadei bad ka bor jong ka jingtrei ha ka kam rep kam riang hynrei kila iai bteng ban mad ban ioh ia ka jaka, pisa, kor teknoloji, ki iew ki hat bad ha kaban shim ia ki rai kiba kongsan. Ki la ban jur ba ka Meghalaya ka la nang paw kum ka nongialam ha ka rep ka riang kaba iai neh bad ka bym pyndonkam dawai bad ka don ruh ia ka lad ban pynlong ia ki kynthei kum ki nongialam kiba hakhmat na ka bynta ka jingseisoh ha ka thain nongkyndong bad na ka bynta ka bha ka miat jong ka shnong ka thaw.