Ha Nongkhyllem la pyllait ia u khla Thapbasim bad Kyrbei

Ka Meghalaya State Zoo ka la ioh ban pyllait noh ia u Chinese Pangolin (Manis pentadactyla) ne Kyrbei bad ia u Asian Palm Civet (Paradoxurus hermaphroditus) ne Khla Thapbasim hapoh Nongkhyllem Wildlife Sanctuary hadien ba kitei ki ar tylli ki mrad ki la shah sumar hadien ba la ioh ba ioh bat da ki paidbah.

Ka Tnad Forest ka la pyntip, ba kane ka jingpyllait ka long kaba kongsan khamtam haba kitei ki artylli mrad ki dei kiba iarap ban tyngkai ia ka mariang bad u Chinese Pangolin u dei u mrad uba don ha ka thup jongka “Critically Endangered” ne don jingma bha ban duhjait noh ha ka thup jongka IUCN bad uba don jingma ruh ha ka ban shah khaii be-aiñ, katba u Asian Palm Civet udei uba noh synniang ha ka ban pynkhie im biang ia ki khlaw lyngba ka jingpynsaphriang ka jongu ia ki symbai ki bapher bapher.

Ia u Chinese Pangolin la ioh ban pyllait im da ki nongtrei jong ka Nongpoh (Wildlife) Range na ka surokbah NH-6 hajan ka Jiva Restaurant, Nongpoh bad ia u Asian Palm Civet uba la don hapdeng ka jingmynsaw la ioh ban pyllait im dang shen na Jaintia Hills.

Ia kine ki mrad khlaw la rah noh sha Meghalaya State Zoo ban ioh ia ka jingsumar bad ka jingshah khmih bniah bad haba ki riewshemphang jong ka Veterinary kila pynthikna ba kila long kila koit la khiah bha la pyllait noh ia kine ki mrad da Meghalaya State Zoo bad Nongpoh (Wildlife) Range ha ka jingdon ryngkat lang u Chief Conservator of Forests (Wildlife) bad CEO ka Meghalaya Zoo Project Implementation Society, u PK Agrahari bad Meghalaya State Zoo Director u Pavan Khade bad kiwei kiwei.

U Agrahari ula ong ba ka jingpyllait im ia ki mrad khlaw, ka jingai jingsumar bad ka jingpyllait biang ia ki kadei ka bynta kaba kongsan ha ka jingpyrshang ban ialeh ban pynneh pynsah ia ki mrad khlaw bad ula ong ba ki Chinese Pangolin kidei kiba la tip kum kiba don hapdeng ka jingma kaba khraw ha ka thup jong ka IUCN bad la iada ia ki lyngba ka Schedule-I jongka Wild Life (Protection) Act, 1972, kaba ai ia ki Pangolin ia ka kyrdan kaba heh tam ban ioh jingiada ha ka ri.

Ula ong ba kine ki mrad ki mad ia ka jingma kaba khraw na ka jingshah khaii be-aiñ bad ka jingduh noh ia ki jaka sah ka jongki, kumta kane ka jingseisoh ban pyllait ia kine ki mrad ka pyni ia ka jingiengskhem ka tnad na ka bynta ban pynneh pynsah ia ki mrad khlaw bad na ka bynta ka bha ka miat jong ki mrad, da ka jingtrei shitom jong ki nongtrei ka Meghalaya State Zoo bad ka Khasi Hills Wildlife Division, Shillong.

U Agrahari ula kyntu ia ki paitbah ba kin iarap ha kaban pyllait im ia ki mrad khlaw da kaba pyntip sha ka tnad halor ki mrad khlaw kiba don hapdeng ka jingpang jingshitom khnang ba yn ioh ai jingsumar bad ban ioh ban pyllait noh ia ki.