Ki paidbah ki shongshit VPP ka Party thymmai, ki MDC la shisnem ym pat ioh skhim: Pius

U MLA ka UDP na Ranikor u bah Pius Marwein ula kam ba ka jingshong shit ki paidbah ia ka party Voice of the People Party (VPP) ka ju dei hi namar ba ka dang thymmai, namar ba ki khmih lynti ba kan leh ia ki jingangnud hynrei kane kan ym long kaba suk.Haba kren halor kane, u bah Pius ula ong ba ka party kaba dang thymmai ki paidbah ki mutdur ba kan ai jingangnud jong ki hynrei yn da la jop wat tang ha konstitwensi ki don shibun ki jingeh, ki jingdonkam jong u paidbah. U bah Pius ula ong ba ka VPP ka la kular ia kiba bun hynrei yn da ki la shong ha ka bor, ym pat iohi ia kata ka jingkylla la palat shi snem tam.

“Ki paidbah ki don ka jingshaniah haba wan ka party thymmai namar ba ha ki 2-3 snem, ki la kular ba yn da ki la wan ha ka bor synshar ha KHADC, kin sa wanrah shibun bah ka jingkylla, hynrei yn da ki la shong ha ka bor ka jingialam jong ki, ngam pat iohi haduh mynta ia kata ka jingkylla kumba ki angnud ba kin wanrah,” ong u bah Pius.   U la kyntait ba ki paidbah kin phai khmat sha ka party Prah, hynrei ha ka jingshem jong u, ki paidbah ki don ka jingshaniah ha ka UDP. “Ha nga shimet nga shem ba naduh ki MDC ilekshon, ki paidbah hi ki don ka jingshaniah ha ka jingialam jong ka party UDP,” ula bynrap.

U la ong ba wat mynta ha KHADC la shi snem ba synshar ka VPP, ki MDC kim pat ioh skhim wat tang shi naia ruh ban ai sha ki paidbah katba mynshwa pat ki ioh man u snem.“Mynta la shi snem pura naduh ba ialam ka VPP ia ka EC ha KHADC haduh mynta ngim pat ioh ia ki skhim ki ban ai sha ki konstiwensi kumba ki ai ha ki por ba mynshwa,” ula ong.