Kylla iingjah bad sop niut ki iing basa bad ka Traditional Cultural Centre KHADC ha jingkieng Kalong

Ka Khasi Hils Autonomous District Council (KHADC) ka la pynlut kai ka pisa da ki phew klur ban shna ki jaka sah, jaka bam Restaurant bad ka Traditional Cultural Centure ha jingkieng Kalong da ka jingthmu ban pynlong ia katei jaka kum ka jaka shangkai pyrthei. Ka jingtei ia kitei ki iingbasa, kumjuh Restuarant kum ka jaka bam na bynta ki nongwan kai bad ka Traditional Cultural Center ka sdang naduh u snem 2018, hynrei la khang noh da ka iing bishar halor ka nongrim ba ka lah pynjaboh namar ka don harud ka pung Umiam bad haduh imat ym don shuh ba peit ia kitei jingtei la kumba 5 snem tam hadien ba la deo shna. U Nongthoh khubor ula lap ba kitei ki jingtei bun la dep, hynrei namar ba ym don ki nongpeit nongsumar ki la jot la pra bad kylla iingjah na ka jinglong ka mariang.

La lap ki jingtei ia ki iingbasa palat shiphew tylli la dep bad la shna itynnad bha da ka dewbilat bad siang da ki tile bad ia ka tnum la tap da ki tin, hynrei kitei ki iing ki la jot la pra bad ki tnum ba tap tin bun ki la shah lied ha ka eriong bad kumjuh ki jingkhang ki la shah lied noh. Kumjuh ka Restaurant na ka jaka bam la dep shna naduh ka siang tile, ka sad bad tap da ka tin ia ka tnum hynrei isangsot ban peit ba katei ka iing mynta, namar shiliang ka la ing noh na ka jingpluh ding dang shen bad ka tnum ha ki bynta shakhmat ka la hap noh. Katba ka jingtei ia ka Traditional Cultural Centre ba dangsah katto katne ban siang tile, ki jingkhang bad kiwei kiwei. Ka long isangsot ban peit ia kitei ki iing namar bym don nongpeit nongsumar ki la kylla iingjah bad jot ei mynta bad ki kylla jaka rieh tngen jong ki riew sniew bad jaka ia bam iadih sngewbha ki nongleit khwai.

Ka District Council ka la pynlut da ki phew klur ban shna ia kitei ki iiing baitynnad na bynta ban khring ia ki nongwan shangkai sha katei ka jaka, namar ka don harud ka pung Umiam ha kaba ki briew ki ju leit kai bad khwai man ka sngi, hynrei ka la pulom noh hadien ba ka iing bishar ka la khang pyrshah ioh ka ktah ia ka pung Umiam. Katkum ka jingtip ba la ioh la mang T.7.50 klur ban shna ia ka Traditional Cultural Centre ha jingkieng Kalong lait noh kiwei ki jingtei. Ka KHADC ka dei ban shimkhia mardor ia kane ka kam khnang ba kan ym sep ei ka jingpynlut pisa bad lada ka leh kloi ka dang lah maramot ha ka jinglut ba duna, hynrei lada ka shu ieh kumto ki lah ban jah rngai bad kaba eh long kan hab ban sdang thymmai biang bad kane kan ktah ia ka pla tyngka ka council.