Da ka jingsngewkhia halor ka jingjaboh bad kylla rong ka wah Umlew, na ka liang ka Wah Umlew Protection Committee mynta ka sngi ka la dawa na ki bor sorkar ba kan shimkhia mardor ban iada ia kane ka wah. Lah ban kdew ka Wah Umlew Protection Committee ka dei ba la khmih da ki nongialam jong ki 9 tylli ki Shnong kiba sumar ia kane ka wah ba ki paidbah ki ioh jingmyntoi shikatdei na kane ka wah, hynrei ka jingnang jaboh jong kane ka wah ka la buh ia kiba bun hapdeng ka jingkhuslai kaba jur.
Haba kren bad ki Nongthoh Khubor, u Bah Pynskhemlang Sohtun, General Secretary ka Wah Umlew Protection Committee, ula iathuh ka daw ka jingjaboh jong kane ka wah ka dei na ka jingpyntrei bad tih khyndew ka Dhar Construction Company na Nongkohlew sha NEIGHRIMS. Ula iathuh ruh, ba na ka liang ka Comittee kaba sumar ia kane ka wah ki dap da ka jingsngewkhia jur namar ki paidbah kim ioh shuh ban pyndonkam ia kane ka wah bad ka la buh jingma ruh wat ia ki dohum dohwah ha kane ka wah, u la bynrap ruh na ka liang ka committee ka la dep ban iakren bad u manager ka Dhar Construction ban shim ia ki lad ban iada ia ka jingpynjaboh ia kane ka wah hynrei kam shym la don kano kano ka jingshimkhia haduh kine ki khyllipmat.
Halor kane ka bynta, na ka liang ka Umlew Protection Committee ka la kyrpad ia ki bor sorkar ban shimkhia mardor ban shim ia ki lad ban iada ia kane ka wah na ka jingjaboh khnang ba ki paidbah ki 9 tylli ki Shnong kin ym duh jingmyntoi.
You may also like
-
Khynra ka ANTF ha Lumsurvey, kurup drok ba T.75 lak
-
Kynduh ka ka FKJGP ïa u SDO ba sniew palat ka surok Baridua-Killing
-
Ka AI Job Fair ka thong ban wanrah jingkylla ia ka Meghalaya sha ka ‘AI Valley’
-
Ka MeghGo App kan iarap ia ki nongniah kali bad ki paidbah nongleit nongwan
-
Hiar kynsan ka Helikoptar ha Kongripa, ioh shon dur ei ki longkmie bad Pilot
