Pyllait u Myntri Transport ia ka Portal na bynta ka skhim OTS

U Symbud Myntri Rangbah ba khmih ia ka tnat Transport u Bah Sniawbhalang Dhar hynne ka sngi ula pyllait paidbah ia ka Portal ban pyntreikam ia ka skhim One Time Settlement (OTS) 2026. Kane ka Portal jong ka skhim OTS ba la wanrah da ka Tnat Transport ka dei ban ai jingïarap ïa ki trai kali kamai kiba dei ban siew ïa ki khajna kali kiba dang sahteng, kum Fitness bad ka Goods and Passenger Tax nalor kiwei de ki jingsiew. Ki don ym duna 65,000 tylli ki kali kamai kiba dei ban siew kuna katkum ka Motor Vehicles Tax, 12,642 tylli ki kali kiba hap siew kuna jong ka khajna Goods and Passenger Tax, bad 57,000 tylli ki kali ba hap siew ia ka kuna jong ka khajna Fitness Certificate.

Haba kren sha lad pathai khubor u Bah Sniawbhalang ula ong, ba ia kane ka skhim One Time Settlement (OTS) 2026 la mynjur da ka kynhun Myntri Sorkar ban pynsting ia ki jingeh bad ban ai lad ia ki trai kali kamai ban siew ia ki khajna ba ki dei ban siew. U Bah Sniawbhalang ula pyntip ba ka OTS kan sdang treikam naduh ka 12 tarik Jylliew bad kan neh haduh u bnai Naitung bad kane kan ai lad ia ki trai kali kamai ban sdang noh ban leit siew ia ki khajna ba ki dei ban siew. U la pyntip ba lyngba ka OTS, yn mab noh haduh 90 percent ka kuna (penalty) haba ia dei bad ka Fitness jong ki kali bad 80 percent ka khajna (MV tax/Goods & Passenger tax).

U Myntri ula iathuh ha ka jingshisha ka Sorkar ka dei ban ioh lum palat T.1100 klur ka kuna, hynrei namar ba la mab noh ia ka kuna lyngba ka skhim OTS, ka Sorkar kan ioh lum tang kumba T.120 haduh T.150 klur ka khajna kali, lada baroh ki trai kali ki wan ban shim ia kane ka skhim. “Naduh la shai ka sngi ki paidbah ki lah ban wan shakhmat ban siew noh ia ka bai kot, bai sla kali kamai kumba ngi la pynbna. Kane ka skhim OTS ka dei na ka bynta baroh ki kali kamai barit ne ba heh. Nga kyntu ia ki trai kali kamai ban shim kabu ia kane ka skhim ban pynkhuid noh ia ka kuna ba ki dang sah” la ong u Bah Sniawbhalang.